اے این -32 طیارہ کے حادثہ میں تمام 13 افراد ہلاک: فضائیہ
نئی دہلی13جون (ایس او نیوز/ آئی این ایس انڈیا) فضائیہ نے جمعرات کو کہا کہ اروناچل پردیش میں گر کر تباہ ہوئے اے این -32 طیارے میں سوار تمام 13 افراد ہلاک ہو چکے ہیں۔ اروناچل پردیش کے گھنے پہاڑی علاقے میں جمعرات کو بچاؤ عملہ کی ایک ٹیم کی طرف سے طیارے کا ملبہ تلاش کئے جانے کے بعد فضائیہ نے اس کی اطلاع دی۔ فضائیہ کے ایک افسر نے بتایا کہ اے این -32 طیارے کے حادثے میں کوئی بھی شخص زندہ نہیں بچا ہے۔ ترجمان نے کہا کہ فضائیہ تین جون 2019 کو اے این -32 (ہوائی جہاز) کی گمشدگی کے تناظر میں اپنی جان گنوانے والے فضائیہ کے بہادر جانبازوں کو خراج عقیدت پیش کرتی ہے اور وہ مرنے والوں کے اہل خانہ کے ساتھ کھڑی ہے۔روسی ساختہ اے این -32 طیارے تین جون کو آسام کے جورہاٹ سے چین کی سرحد کے قریب سے گزر رہا تھا کہ یکایک طیارہ کا رابطہ ریڈار سے منقطع ہو گیا۔ فضائیہ کے ایک ہیلی کاپٹر نے منگل کو سیانگ ضلع کی سرحد پر واقع گاٹے گاؤں کے قریب 12ہزار فٹ کی اونچائی پر طیارے کا ملبہ دیکھا تھا۔ اس سے قبل طیاروں اور ہیلی کاپٹروں کے بیڑے اور بری افواج نے آٹھ دنوں تک وسیع تلاش مہم چلائی تھی۔ فضائیہ کے ایک افسر نے بتایا کہ بچاؤ عملہ کی 15 رکنی ایک ٹیم بدھ کو بھیجی گئی تھی اور ان میں سے آٹھ افراد جمعرات کو موقعہ پر پہنچے تھے۔