الحشد ملیشیا کی بغداد ہوائی اڈے کے قریب عمارتوں پر دھاوے
دبئی 3 جنوری (آئی این ایس انڈیا) عراق میں العربیہ اور الحدث چینلوں کے نامہ نگاروں کے مطابق الحشد ملیشیا کے ارکان نے بغداد کے بین الاقوامی ہوائی اڈے کے قریب موجود عمارتوں پر دھاوا بولا اور اندر گھس کر توڑ پھوڑ کی۔
عراق کے سیکیورٹی ذرائع نے بتایا کہ بغداد میں ایرانی پاسداران انقلاب کے کمانڈر قاسم سلیمانی کی برسی کے موقع پر سیکیورٹی کے سخت ترین انتظامات کیے گئے ہیں۔ تمام سیکیورٹی اداروں اور انٹیلی جنس اداروں کو الرٹ کر دیا گیا ہے۔
جوائنٹ سیکیورٹی کنٹرول روم کی طرف سے جاری ایک بیان میں کہا گیا ہے کہ بغداد میں بڑی تعداد میں سیکیورٹی فورسز کے اہلکار تعینات کیے گئے ہیں۔
ایرانی کمانڈر قاسم سلیمانی کے قتل کی پہلی برسی کے موقعے پر بغداد میں تمام سفارت خانوں کی سیکیورٹی مزید سخت کر دی گئی ہے۔
الحشد ملیشیا کے وفاداروں نے حال ہی میں بغداد کی شاہراہ ایئرپورٹ کا نام تبدیل کر کے 'شاہراہ ابو مہدی المہندس' رکھا ہے۔ المہندس قاسم سلیمانی کے ہمراہ تین جنوری 2020ء کو بغداد کے بین الاقوامی ہوائی اڈے پر امریکی ڈرون حملے میں ہلاک ہوگئے تھے۔