بجلی کی بڑھتی قیمت کے خلاف بھٹکل الفلاح یوتھ سروس آرگنائزیشن کی طرف سے دیا گیامیمورنڈم
بھٹکل 23/اکتوبر (ایس او نیوز) الفلاح یوتھ سروس آرگنائزیشن کی جانب سے اسسٹنٹ کمشنر بھٹکل کی معرفت ریاستی گورنر کے نام ایک میمورنڈم دیا گیا جس میں بغیر کسی پیشگی اطلاع کے بجلی کی یونٹ شرح میں اضافہ کیے جانے کی مذمت کی گئی ہے اور مطالبہ کیا گیا ہے کہ پہلے ہی سے مختلف مسائل کے بوجھ تلے دبے ہوئے عوام پر بجلی کی قیمتوں میں اضافہ کا مزید بوجھ نہ ڈالا جائے۔
میمورنڈم میں کہا گیا ہے کہ سرکاری طورپر بجلی کی قیمتوں میں اضافہ کرنے کی کوئی تجویز زیر غور نہ ہونے کی بات کہی گئی تھی۔لیکن بجلی سربراہی کرنے والی کمپنی کی طرف سے یونٹوں کی قیمت بڑھا دی گئی ہے۔ ایک طرف قحط سالی اور دوسری طرف سیلاب کی وجہ سے ریاست کے عوام پہلے ہی سے بڑی تنگ حالی کا شکار ہوگئے ہیں اور زندگی بسر کرنا ان کے لئے دوبھر ہوگیا ہے۔ اس پر مزید بجلی کی قیمت میں اضافہ کرنا لوگوں کے لئے ناقابل برداشت مشکل کھڑی کرنے جیسا ہے۔اس لئے گورنر کی طرف سے ریاستی حکومت کو اس پر روک لگانے کی ہدایت جاری کی جائے۔
میمورنڈم میں یہ بھی کہا گیا ہے کہ بجلی سربراہی کرنے والی کمپنیوں کو چاہیے کہ وہ اپنی کوتاہیوں کا ازالہ کریں اور ہونے والے نقصانات پر خود ہی قابو پانے کی تدابیر کریں۔ اپنی بدانتظامی کی وجہ سے ہونے والے نقصانات کا بوجھ عوام پر لادنے کی کوشش نہ کریں۔ اس کے علاوہ بجلی کا خرچ کرنے کے لئے سرکاری طور پر سڑکوں پر روشنی کے لئے ایل ای ڈی بلبس کا استعمال کیا جائے۔
میمورنڈم میں شکایت کی گئی ہے کہ ریاست کے مختلف علاقوں میں جو نئے میٹر لگائے گئے ہیں ان میں خامی ہونے اور ان میٹرس کی وجہ سے بل زیادہ آنے کی بھی شکایات مل رہی ہیں۔ صرف ایک یا دو بلب استعمال کرنے والے گھروں میں بھی ماہانہ سیکڑوں روپے الیکٹرک بل آرہا ہے۔ اس سلسلے میں پوری تفتیش کی جائے ا ور میٹروں میں کوئی نقص ہوتو ایسے میٹرس ہٹانے کے احکامات جاری کیے جائیں۔