بیدر۔4/اکتوبر۔(محمدامین نواز/ایس او نیوز) الامین ایجوکیشنل سوسائٹی  کی طرف سے جمعہ کو ایک اعزازی جلسے کا انعقاد کیا گیا جس میں شرکت کرتے ہوئے  وی آر ایل ٹرانسپورٹ کمپنی کے بانی  اور کنڑا روزنامہ وجے وانی کے ایڈیٹر ڈاکٹر وجئے سنکیشور نے  الامین کے لئے دس لاکھ کی خطیر رقم دینے کا اعلان کیا۔

پروگرام سے خطاب کرتے ہوئے مہمان خصوصی جناب سنکیشور نے کہا کہ آج میں تعلیم و تدریس کے جس خوب صورت گلشن میں حاضری دے رہا ہوں ، اُس  کی خوشبو نے اب تک لاتعداد ذہنوں کو معطر کیا ہے اور مکمل خواندہ ہندوستان کے خواب کی تکمیل میں اپنا رول ادا کیا ہے۔میں حیران ہوں کہ صرف ایک آدمی کے عزم سے کس طرح ایک بڑا ادارہ وجود میں آگیا۔اور پھر لوگ آتے گئے اور قافلہ بنتا گیا۔ انہوں نے الامین کی خدمات کا اعتراف کرتے ہوئے کہا کہ  الامین جس خاموشی اور اعتماد سے تعلیم و تدریس کے میدان میں آگے بڑھ رہا ہے اس سے ہندوستان کے روشن مستقبل کا خواب سچ ہوتا نظر آرہا ہے۔ یہ ہندوستان کی مشترکہ تہذیب کا حامل وہ تعلیمی مرکز ہے جس سے ہندوستان کا سربلند ہوتا ہے۔ادارہ کے لئے اپنی جانب سے دس لاکھ روپئے دینے کا اعلان کرتے ہوئے ڈاکٹر سنکیشور نے کہا کہ مجھ سے جہاں تک ممکن ہوگا اس ادارے کی ترقی کے لیے ہر سطح پر کوشش کروں گا  ساتھ ساتھ  اپنے حلقہ، احباب کو بھی اس طرف متوجہ کروں گا تا کہ وہ اپنے ہی وطن کے ایک مثالی تعلیمی ادارے کی حقیقت سے واقف ہوسکیں اور اس کی خدمات کو جان سکیں کہ کس طرح ایک محب وطن انسان خاموشی سے اپنے وطن کے نونہالوں کی تعلیمی فکر میں سرگرداں ہے۔ 

ایک اور مہمان جناب خسرو قریشی صاحب (سابق چیرمین مائناریٹی کمیشن ) نے اپنے خطاب میں کہا کہ؛یہ میری دلی خواہش تھی کہ میں اپنے دوست ڈاکٹر سنکیشور صاحب کو الامین کے اسٹیج سے خطاب کرتے ہوئے دیکھوں، میں نے ڈاکٹر ممتاز احمد خان سے اس کی اجازت چاہی تو وہ دل کی خوشی کے ساتھ راضی ہو گئے اور کہا کہ یہ کوئی نجی ادارہ نہیں ہے۔ یہ ہر اس ہندوستانی کا ادارہ ہے جو وطن عزیز کے بچوں کی تعلیمی ترقی کا جذبہ رکھتا ہے۔ انہوں نے مزید کہا کہ ڈاکٹر سنکیشورکو سب سے زیادہ خوشی تعلیمی اداروں کو دیکھ کر اور اس سے جڑ کر ہوتی ہے۔ وہ ہند و مسلم یکجہتی کی ایسی مثال ہیں جن پر سبھی کو فخر ہے۔ وہ کنڑا زبان کے پرستار ہیں۔ تو انہیں اردو اور ہندی سے بھی پیار ہے۔انہوں نے  الامین کے بانی ڈاکٹر ممتاز احمد خان کی بھی تعریف کی اور کہا کہ  جب تک ڈاکٹر ممتاز احمدخان جیسے لوگ پیدا ہوتے رہیں گے، آندھی میں بھی چراغ جلتا رہے گا۔

جلسہ  کی صدارت  کرتے ہوئے  بابائے تعلیم ڈاکٹر ممتاز احمد خان نے  ڈاکٹر سنکیشورکے لیے تشکر کے جذبات کا اظہار کیا، ساتھ ساتھ جناب خسرو قریشی کا بھی شکریہ ادا کرتے ہوئے کہا کہ  وہ  لوگوں کو آپس میں ملانے اور دلوں کو جوڑنے میں ہمیشہ دوسروں سے سبقت لے جاتے ہیں۔انہوں نے کہا کہ  ذاتی طور پر اُن کا اور الامین تحریک کا کبھی کسی سیاسی پارٹی سے تعلق نہیں رہا ہے کہ ہمارا مشن صرف اور صرف تعلیم و تدریس رہا ہے۔ اس کے لیے ہم نے حتی المقدورہر حکومت کا اعتماد حاصل کیا اور اس ادارے کو قومی سطح پر کامیابی سے ہمکنار کرنے کی کوشش کی۔ آپ جیسے دوستوں کا خلوص اس ادارے کی رگوں میں جب تک لہو بن کر دوڑتا رہے گا یہ ادارہ انشاء اللہ یونہی ترقی کرتا رہے گا۔

الامین کے  سکریٹری   سبحان شریف نے الامین ایجوکیشنل سوسائیٹی کی پچاس سالہ روداد پر اختصار سے روشنی ڈالی اور بتایا کہ الامین نے کتنے نشیب و فراز کا سامنا کیا اور اس مقام تک پہونچا۔ انہوں نے کہا کہ آج الامین کے ڈھائی سوسے زائد اسکول اور کالج پورے ملک میں چل رہے ہیں جن میں انجینئرنگ کالج، لا کالج، پیرا میڈیکل کالج، کامرس کالج اور بہت سارے دیگر علوم سے متعلق کالج اور اسکول ہیں جن میں ڈھائی لاکھ بچے اور بچیاں زیر تعلیم ہیں۔  مہمانوں کے استقبال کے فرائض ڈاکٹر حافظ کرناٹکی نے ادا کیے اور ڈاکٹر بی،ام،ذاکر کے شکریہ کے ساتھ جلسہ اختتام کو پہنچا۔