باندہ، 2؍دسمبر (ایس او نیوز؍ایجنسی) سماجوادی پارٹی(ایس پی) سربراہ اکھلیش یادو نے کہا کہ بلڈوزر چلانے میں ماہر اترپردیش کی بی جے پی حکومت کا صفایا عوام آنے والے اسمبلی انتخابات میں ووٹوں کے بلڈوزر چلا کر کریں گی۔ بندیل کھنڈ میں اسمبلی انتخابات کے لئے انتخابی مہم کا آغاز کرتے ہوئے اکھلیش نے بدھ کو یہاں سرکاری انٹرکالج میدان پر منعقد عوامی ریلی سے خطاب کرتے ہوئے کہا کہ ریاست میں کسان، مزدور، کاروباری اور نوجوان سبھی بدحال ہیں۔ نوجوانوں کو روزگار نہیں مل پا رہا ہے۔ مہنگائی اور بے روزگار سے عوام پریشان ہیں اور نوجوان بے کار گھوم رہے ہیں ۔ کسانوں کو فصلوں کی قیمت اور کھاد پانی نہیں مل رہا ہے۔ مویشیوں سے کسانوں کی فصل کو بچانے کے لئے حکومت نے کچھ نہیں کیا۔ رات دن کسان جاگ کر مویشیوں سے فصلوں کی حفاظت کر رہے ہیں۔

انہوں نے کہا کہ بندیل کھنڈر کے کسانوں کے ساتھ دھوکہ ہوا ہے۔ حکومت نے بندیل کھنڈ کو کچھ بھی نہیں دیا ہے۔ جبکہ موجودہ حکومت میں بندیل کھنڈ سے سبھی اراکین اسمبلی بی جے پی کے ہیں۔ بی جے پی حکومت کے وعدے اور جملے سبھی جھوٹے ثابت ہوئے ہیں۔ کورونا بحران میں لاک ڈاؤن کی وجہ سے مہاجر مزدوروں کو واپس لوٹنے کا فوراً انتظام نہ ہونے سے متعدد مزدور ہلاک ہوئے اور انہیں پولیس کی لاٹھی۔ ڈنڈوں کا سامنا کرنا پڑا۔ حکومت نے ان کی کوئی مدد نہیں کی۔ اگر مدد کی تو صرف سماج وادی پارٹی نے جس نے سبھی متوفی بے سہارا کنبوں کو ایک لاکھ روپئے دئیے۔

وزیر اعلی یوگی آدتیہ ناتھ کی تنقید کرتے ہوئے انہوں نے کہا کہ جن کا پریوار نہیں ہوتا ہے وہ کسی کنبے کا دکھ نہیں سمجھتے ہیں۔ صرف متاثرہ کنبوں کی وہی مدد کرتے ہیں جن کا پریوار ہوتا ہے۔ انہوں نے کہا کہ دمدار حکومت چلانے والے جھوٹ بولنے والے ہیں۔ ان کی جھوٹی باتیں ہی دمدار ہیں۔ بی ایڈ بے روزگار، شکچھا متروں، کسانوں و نوجوانوں سے کئے گئے سبھی وعدے بے کار ثابت ہوئے ہیں۔ نہ ہی کسانوں کی آمدنی دوگنی ہوئی ہے اور نہ ہی کروڑوں لوگوں کو نوکریاں دینے کے سپنے پورے ہوئے ہیں۔

اکھلیش نے بھیڑ سے سوال کیا کہ یوگی حکومت چاہئے یا ریاست میں اہل حکومت چاہئے۔ وزیر اعلی یوگی لیپ ٹاپ و اسمارت فون بھی چلانا نہیں جانتے ہیں اور اب اسمارٹ فون و ٹیبلیٹ وغیرہ تقسیم کئے جا رہے ہیں۔انہوں نے سوال کیا کہ ساڑھے چار سالوں تک یوگی حکومت اب تک کیا کرتی رہی اور انتخابات آتے ہی اسمارٹ فون و ٹیبلیٹ تقسیم کی یاد آئی ہے، جبکہ ریاست کے زیادہ تر نوجوانون کے پاس ایس پی میعاد کار کا لیپ ٹاپ موجود ہے۔

انہوں نے کہا کہ ٹی ای ٹی پرچہ لیک ہونا شرمناک بات ہے یہ حکومت بے روزگار نوجوانوں کو نوکری نہیں دینا چاہتی ہے۔ جس سے ریاست میں بار بار پرچہ افشاں حکومت بذات خود کر رہی ہے۔ ایس پی صدر نے کہا کہ 'ہماری حکومت نے گزشتہ حکومتوں میں شروع کئے گئے کاموں کو رفتار دیا تھا جبکہ موجودہ بی جے پی حکومت ہمارے حکومت میں شروع کئے گئے ترقیاتی پروجکٹوں کو روکے ہوئے ہے۔ پروجکٹوں، سڑکوں، شہروں و اداروں کا نام تبدیل کرنے میں ماہر بی جے پی حکومت نام بدلنے میں عالمی ریکارڈ بنانے جا رہی ہے۔

انہوں نے کہا کہ اترپردیش کی ڈبل انجن حکومت ناکام ہوگئی ہے۔ بجلی کے بل مہنگے ہوگئے ہیں۔ اور بجلی پروڈکشن ٹھپ ہے۔ مہنگائی اپنے عروج پر ہے۔ نوجوان کسان مزدور کاروباریوں کے لئے کچھ بھی نہیں کیا گیا ہے اور لوگ انصاف سے محروم ہیں جبکہ ایس پی میعاد کار میں سینچائی، صحت، تعلیم مفت میں دی جاتی تھی اور بڑے پیمانے پر ترقیاتی کام ہوئے تھے۔ انہوں نے کہا کہ مسائل کے حل اور خوشحالی کے لئے اب بی جے پی کا صفایا ہونا یقینی ہے اور آنے والے اسمبلی انتخابات میں بی جے پی کو تاریخی شکست سے دوچار ہونا پڑے گا۔