نئی دہلی،7ستمبر(ایس او نیوز/آئی این ایس انڈیا) ہندوستان نے پاکستان کو دہشت گردی کے معاملے پر سخت خبردار کیا ہے۔قومی سلامتی کے مشیر اجیت ڈوبھال نے کہا کہ پاکستان کے پاس صرف دہشت گردی ہی ہتھیار ہے اور اسے ہم کامیاب ہی نہیں ہونے دیں گے۔ڈوبھال نے سرحد پار دہشت گردوں کے فعال ہونے کی تصدیق کی۔انہوں نے یہ بھی کہا کہ کشمیر میں عام لوگ حکومت کے فیصلے کے ساتھ ہیں اور آنے والے وقت میں یہ صوبہ نئے مواقع لے کر آئے گا۔ڈوبھال نے کہا کہ 370 کشمیر کے لئے خصوصی درجہ نہیں، خصوصی امتیاز تھا۔آگے پاکستان کو خبردار کرتے ہوئے انہوں نے کہا کہ ان کے منصوبے کامیاب نہیں ہونے والے ہیں کیونکہ کشمیر میں مکمل طور پر امن ہے اور حالات معمول ہیں۔این ایس اے ڈوبھال نے کہا کہ رائٹ ٹو ایجوکیشن، رائٹ ٹو پراپرٹی جیسے 106 قانون تھے جو 370 کی وجہ سے جموں کشمیر میں لاگو نہیں تھے۔یہ خصوصی درجہ نہیں خصوصی امتیاز تھا۔سرحد پار سے دہشت گردانہ سرگرمیوں کی ہدایت ملنے کی تصدیق کرتے ہوئے ڈوبھال نے کہاکہ سرحد سے 20 کلومیٹر کے فاصلے پر پاکستان کے مواصلات ٹاور ہیں،ہم نے ان کی بات چیت سنی ہے جس میں کہہ رہے ہیں کہ تم لوگ کیا کر رہے ہو؟ وہاں (کشمیر) اتنے سارے سیب سے بھرے ٹرک کیسے چل رہے ہیں؟ تم لوگ ان کو بند نہیں کر سکتے،آپ کے لئے کیا اب چوڑیاں بھجوا دیں؟۔این ایس اے ڈوبھال نے دہشت گردی کا ساتھ دینے کے لئے پاکستان کو آڑے ہاتھوں لیا۔انہوں نے کہاکہ پاکستان میں سرحد پار سے 230 دہشت گردوں کی شناخت ہوئی ہے،ان میں سے کچھ کو گرفتار کیا گیا ہے اور کچھ کی نشانزد کر دیا گیا ہے،ہم کسی بھی صورت حال سے نمٹنے کے لئے مکمل طور پر محتاط ہیں۔ انہوں نے سوپور میں زخمی ہوئی ڈھائی سال کی بچی کو علاج کے لیے ایمس لانے کی ہدایت دی ہے۔