نئی دہلی، 9 جولائی (ایس او نیوز/آئی این ایس انڈیا) ایئر انڈیا کی اے آئی 966 (جدہ-حیدرآباد- ممبئی) اور اے آئی 964 (جدہ-کوچین) پروازوں میں حجاج کرام کو مقدس آبِ زم زم کین لانے کی اجازت دے دی گئی ہے۔ حجاج کرام مجاز اشیاء کے ساتھ آبِ زم زم کا کین بھی لا سکتے ہیں۔ اس کے لئے 5 کلو خصوصی الاؤنس ملے گا، اسے دستی سامان الاؤنس میں نہیں بدلا جائے گا۔ ایئر لائن نے منگل کو ٹوئٹر پراس کی اطلاع د ی۔آبِ زم زم کے کین لانے پر پہلے روک کی وجہ سے مسافروں کو ہوئی تکلیف کے لئے ایئر انڈیا نے معافی بھی مانگی ہے۔آب ِ زم زم حضرت اسماعیل علیہ السلام کی زندہ کرامت میں سے ہے، حضرت اسماعیل علیہ السلام نے ایڑیاں رگڑیں تو بے آب وگیاہ زمین میں سے پانی کے چشمہ پھوٹ پڑے تھے۔واضح ہو کہ:’حجاج کرام تبرکاً آب زم زم لاتے ہیں‘۔نیوز ایجنسی کے مطابق ایئر انڈیا کے جدہ آفس کی جانب سے 4 جولائی کو تمام ٹریول ایجنٹس کے لئے ہدایات تھے کہ اے آئی 966 اوراے آئی 964 پروازوں میں 15 ستمبر تک زم زم کین لانے کی اجازت نہیں ہوگی۔ ایئر لائن نے نام نہاد سیکورٹی کے مدنظران طیاروں میں آبِ زم زم کین لانے پر پابندی لگا دی تھی۔