بھٹکل:8/ستمبر(ایس اؤ نیوز) گذشتہ ساڑھے چار برسوں سے مرکز میں اقتدار پر قابض مرکزی حکومت کی بد انتظامی ،بےشمار غلطیاں اور  غلط فیصلوں کے نتیجے میں روزمرہ کی قیمتیں آسمان کو چھو رہی ہیں ، پٹرول اور ڈیزل کی قیمتوں پر کوئی لگام نہیں ہے۔ مرکزی حکومت کی  مکمل ناکامی کو دیکھتے ہوئے انڈین نیشنل کانگریس نے 10ستمبربروز پیر کو ملک گیر سطح پر بھارت بند میں بند کا اعلان کیاہے۔

ریاستی کانگریس کے ورکنگ صدر ایشور کھنڈرے نے  ہبلی میں پریس کانفرنس کا انعقاد کرتے ہوئے بند کی حمایت میں کہاکہ مرکز کی این ڈی اے قیادت والی مرکزی حکومت  ملک کے عوام سے جھوٹے وعدوں اور اردوں  سے اقتدار پر آئی ہے۔ عوام کو  وہم میں مبتلا کرنے والی مرکزی حکومت  کی  بے شمار غلطیوں کی وجہ سے ملک کی معیشت تباہ و برباد ہوگئی ہے۔ مودی کی رنگین باتوں اور  وعدوں کا دور دور تک پتہ نہیں، جی ایس ٹی، نوٹ بندی ، پٹرول اور ڈیزل کی قیمتیں سمیت  روزمرہ چیزوں کی قیمتوں میں بے تحاشہ اضافہ سمیت ان گنت مسائل کو پیدا کرنےو الی مرکزی حکومت ملک میں بدانتظامی کی راست ذمہ دار ہے۔ مرکزی حکومت کے خلاف عوام میں بیداری پیدا کرنے کے لئے پرامن بند کا اعلان کیا گیا ہے۔ اس کے علاوہ کانگریس کی طرف سے رافل ڈیل کے متعلق ستمبر 7سے 15 تک مسلسل احتجاج درج کیا جارہاہے۔ چار ساڑھے  چاربرسوں سے مودی حکومت عوام کو دھوکہ دے رہی ہے۔ نہ بلیک منی واپس ہوئی ، نہ نوٹ بندی سے کوئی فائدہ ہوا، نہ اچھے دن آئے۔ قومی تحفظ کے نام پر ووٹ لے کر محکمہ دفاع میں بہت بڑا گھپلہ کیاگیا ہے۔ بے قصوروں کو قتل کیا جارہاہے۔ کانگریس نے مرکزی حکومت پرراکشھش کی مانند ہونے کا الزام لگاتے ہوئے کہا کہ  بی جے پی جذبات کو بھڑکا  کر عوام میں نفرت پھیلا رہی  ہے۔ انہوں نے مرکزی حکومت پر آئی ٹی اور ای ڈی محکمہ جات کا بھی غلط استعمال کرنے کا الزام لگایا۔ 

خیال رہے کہ 10/ستمبر کو بھارت بند کو لے کر مینگلور میں بھی کانگریس کی طرف سے پریس کانفرنس کا انعقاد کرکے مینگلور میں احتجاج کئے  جانے کی بات کہی گئی ہے، اسی طرح ضلع اُتر کنڑا میں بھی ضلعی کانگریس صدر کی طرف سے ضلع بھر میں بند منائے جانے کی تائید کی گئی ہے۔