بیلتنگڈی : عوامی ناراضگی کے بعد سیل ڈاون میں کی گئی تبدیلی
بیلتنگڈی 12 مئی (ایس او نیوز) شہر کے سدیموگیرو علاقے میں 6 گھروں سے تعلق رکھنے والے 10 افراد کی کورونا جانچ رپورٹ پوزیٹیو نکلنے کے بعد پٹن پنچایت اور محکمہ صحت کے افسران و عملہ نے 80 گھروں پر مشتمل اس پورے علاقے کو سیل ڈاون کردیا تھا جس کی وجہ سے مقامی افراد کے لئے بڑی دشواریاں پیدا ہوئیں۔ سیاسی لیڈروں کی مداخلت اور عوامی ناراضگی کے بعد سیل ڈاون کے احاطے کو کم کردیا گیا۔
بتایا جاتا ہے کہ اس پورے علاقے میں زیادہ تر قلی مزدوری کرنے والے لوگ رہتے ہیں۔ لیکن علاقہ پوری طرح سیل ڈاون کردینے کے بعد ان کی روزی روٹی کا مسئلہ پیدا ہوگیا کیونکہ کسی کو بھی گھر سے باہر نکلنے کی اجازت نہیں دی جارہی تھی، جب یہ بات سابق ایم ایل اے کے وسنت بنگیرا اور سی پی ایم لیڈران کو معلوم ہوئی تو انہوں نے اس پر سخت اعتراض جتایا اور تعلقہ انتظامیہ اور پٹن پنچایت کے افسران کو آڑے ہاتھوں لیا اور سوال کیا کہ صرف 6 گھروں میں کووڈ مریض نکلے ہیں اور وہ بھی اس وقت اسپتال میں داخل ہیں تو پھر پورے علاقے کو سیل ڈاون کرنے کا مطلب کیا ہے۔
عوامی اعتراض کو دیکھتے ہوئے تحصیلدار مہیش نے جائے وقوع پر پہنچ کر معائنہ کیا اور سیل ڈاون کے لئے جو حد بندیاں کی گئی تھیں انہیں ہٹا کر عوام کے لئے آنے جانے کا راستہ کھول دیا۔ جن گھروں میں پوزیٹیو کیس نکلے ہیں انہی کو گھر کے اندر تک محدود رہنے اور کسی قیمت پر باہر نہ نکلنے کی ہدایت دی گئی ہے۔