کولکاتہ،19ستمبر(ایس او نیوز؍آئی این ایس انڈیا)سچن تندولکر، مہندر سنگھ دھونی کی زندگی پر بنی فلموں سے متاثر ہوکرخواتین کرکٹ میں سب سے زیادہ وکٹ لینے والی بولر جھولن گوسوامی کی زندگی پر فلم بنانے کی تیاری ہو رہی ہے۔

فی الحال فلم کا نام ’چاکدہ ایکسپریس‘ رکھ گیا ہے جس میں جھولن کے آبائی شہر نادیہ سے 2017 خواتین ورلڈ کپ فائنل کی میزبانی کرنے والے لارڈز تک کی کہانی ہوگی۔ہندوستانی ٹیم اس میچ کو جیتنے میں ناکام رہی تھی۔ہندی میں بننے والی اس فلم کو سوشانت داس ڈائرکٹ کریں گے۔ اس سے پہلے ایک بنگالی فلم کی ہدایت کر چکے سشانت نے کہا کہ وہ جلد ہی اس کا سکرپٹ لکھنا شروع کریں گے۔

انہوں نے کہا، ’ فلم کی شوٹنگ چاکدہ سے لارڈرس تک کی جائے گی جس میں جھولن کے کردار کو پردے پر اتارنے کے لئے ہم نے بالی وڈ کی کچھ قد آور اداکاراؤں سے بات کی ہے۔‘ سشانت نے کہا، ’ فی الحال میں کسی اداکارہ کا نام نہیں بتا سکتا کیونکہ ابھی معاہدہ پر دستخط ہونا باقی ہے لیکن بالی وڈ کے بڑے ناموں کے ساتھ ہماری بات جاری ہے۔‘ انہوں نے امید ظاہر کہ اس فلم سے بہت نوجوانوں کو تحریک ملے گی۔ انہوں نے کہا، ’ ہم نے سچن اور دھونی کی زندگی پر بنی فلموں کو دیکھا ہے لیکن کسی خاتون کرکٹر پر بننے والی یہ پہلی فلم ہوگی۔‘ ہم فلم کی شوٹنگ ہر اس جگہ کریں گے جہاں جھولن نے کرکٹ کھیلا ہے۔‘