دسہرہ کی چھٹیوں کے بعد کرناٹک میں اسکولوں کا باقاعدہ آغاز
بنگلورو، 23؍اکتوبر (ایس او نیوز) دسہرہ تقریبات کی چھٹیوں کے بعد ریاست بھر میں جمعرات سے اسکولوں کاآغاز ہوگیا ہے اور 6 تا 10 ویں جماعت کے طلبہ کے لئے کلاسس کے ساتھ اکشرداسوہا اسکیم کا بھی آغاز کیا گیا ہے۔
کووڈ کی وجہ سے اس مرتبہ تاخیر سے اسکول شروع ہونے کی وجہ سے حکومت نے اس مرتبہ صرف یکم اکتوبر تا 20 اکتوبر صرف 11 دنوں کی دسہرہ چھٹی دی تھی۔ چھٹیوں کے بعد طلبہ نے جو ش و خروش کے ساتھ پہلے دن کلاسس میں حاضری دی اور مختلف اسکولوں میں دوپہر کے کھانے کی اسکیم کے ساتھ میٹھے پکوان بھی پکائے گئے ۔
اطلاع کے مطابق بنگلور کے راجا راجیشوری نگر، چناسندرا ، ووڈا نے کندی، دوڈابدرکلو، اندھرہلی، نندنی لے آؤٹ کے کرشنا نندانگر، شیواجی نگر سمیت شہر کے اکثر علاقوں میں پرائمری اور ہائی اسکولوں میں کلاسس کا آغاز کیا گیا ہے۔ متعلقہ حلقوں کے ڈی ڈی پی آئی اور بی ای او نے اسکولوں کا دورہ کر کے جائزہ لیا اور خود بچوں کو کھانا پروسا۔ حکومت کی ہدایت کے مطابق اسکولوں کے اساتذہ اور اکشرداسوہا عملہ نے باورچی خانہ کو پاک و صاف کیا اور غذائی اجناس خرید کر دوپہر کے گرم کھانے کو تیار کیا۔ محکمہ پرائمری و سکینڈری تعلیم کے افسروں نے بتایا کہ اسکولوں میں بچوں کی حاضری کے حساب سے دوپہر کا کھانا تیار کیا گیا جبکہ چند اضلاع میں اکشرادا سوہا اسکیم شروع کرنے میں تاخیر ہوئی ہے۔