منگلورو: جانچ رپورٹ آنے سے پہلے ہی مہاراشٹرا سے لوٹنے والےشخص کو کوارنٹین سینٹرسے چھٹی دیناپڑا مہنگا۔ رپورٹ آئی پوزیٹیو!
منگلورو31/مئی (ایس او نیوز)ممبئی سے لوٹے ہوئے ایک شخص کو کوارنٹین سینٹر میں رکھنے کے بعد جانچ رپورٹ ملنے سے پہلے ہی اس کو گھر جانے کی اجازت دینا ضلع انتظامیہ کو بڑا مہنگا پڑا ہے کیونکہ اس شخص کی جانچ رپورٹ کووِڈ پوزیٹیو آئی ہے۔
معلوم ہوا ہے کہ بولیار کے رہنے والے اس شخص کو پروٹوکول کے مطابق سرکاری طورپر کوارنٹین میں رکھا گیا تھا۔ مگر جانچ کے لئے بھیجے گئے نمونے کی رپورٹ آنے سے پہلے ہی اس کو اپنے گھر جانے کی اجازت دیدی گئی۔ 30مئی سنیچر کو اس کی رپورٹ موصول ہوئی جو کہ پوزیٹیو تھی۔ اس کے بعد مذکورہ شخص کو فوری طور پر کووِ ڈ کے علاج کے لئے مخصوص وینلاک اسپتال میں منتقل کیاگیا۔
بتایا جاتا ہے کہ کوارنٹین سینٹر سے چھوٹنے کے بعد اس شخص نے بولیار کے اندر اور آس پاس میں کئی مقامات کا دورہ کیا اوراپنے گھر والوں کے ساتھ بھی کافی وقت گزارا ہے۔ بولیار میں اور خاص کر اپنے گھر کے آس پاس اس شخص کی وجہ سے کووِڈ وائرس پھیل جانے کے خوف سے لوگ بہت زیادہ تشویش میں مبتلا ہوگئے ہیں،اور ضلع انتظامیہ کی کوتاہی پر افسران کو کوسا جارہا ہے