ٹی ٹوئنٹی کرکٹ کا سب سے بڑا سکور، دنیا کی سب سے بڑی پارٹنر شپ، سب سے زیادہ چھکے، افغانستان نے تاریخ رقم کردی

Source: S.O. News Service | By Shahid Mukhtesar | Published on 25th February 2019, 12:38 PM | اسپورٹس |

دہرہ دون،25؍فروری (ایس او نیوز؍ایجنسی) افغان کر کٹ ٹیم نے ٹی ٹوئنٹی کرکٹ کی نئی تاریخ رقم کردی۔ آئرلینڈ کے خلاف میچ میں کئی ایسے ریکارڈ بنادیے جو شاید آئندہ کئی سال تک بھی نہ ٹوٹ پائیں۔

آئرلینڈ کے خلاف بھارتی شہر ڈیرہ دھوں میں کھیلے گئے دوسرے ٹی ٹوئنٹی میچ میں افغانستان نے پہلے بیٹنگ کرتے ہوئے مقررہ 20 اوورز میں تین وکٹوں کے نقصان پر 278 رنز بنائے۔ اتنے بڑے مجموعے میں سب سے اہم کردار اوپنر حضرت اللہ زازئی نے ادا کیا جنہوں نے 162 رنز بنائے اور ناٹ آﺅٹ رہے ۔ ان کے ساتھ آنے والے اوپنر عثمان غنی نے بھی 73 رنز بنا کر ٹی ٹوئنٹی کرکٹ کے سب سے بڑے مجموعے میں اپنا حصہ ملایا۔

 افغانستان کی جانب سے دیے جانے والے ٹی ٹوئنٹی کرکٹ کے سب سے بڑے مجموعے کے تعاقب میں آئرلینڈ نے بھی خوب فائٹ کی لیکن پھر بھی 84 رنز سے ہار گئی۔ آئرلینڈ کے سٹرلنگ نے 91 اور اوبرائن کے 37 رنز بھی کام نہ آئے اور ٹیم مقررہ 20 اوورز میں صرف 194 رنز ہی بناسکی۔

میچ کے دوران لگنے والے ریکارڈز کی بات کی جائے تو ایک کا اوپر ذکر کیا جاچکا ہے لیکن ا س کی تھوڑی سی مزید وضاحت بھی کردیتے ہیں۔ افغانستان نے انٹرنیشنل ٹی ٹوئنٹی میچ میں 278 رنز بنا ئے ہیں لیکن اتنا بڑا مجموعہ آج تک کسی لیگ میں بھی کوئی ٹیم نہیں بناسکی۔ اس لیے اس کو آل ٹائم سب سے بڑا مجموعہ قرار دیا گیا ہے۔

افغانستان کی جانب سے دوسرا ریکارڈ اوپنرز حضرت اللہ زازئی اور عثمان غنی نے سب سے بڑی پارٹنر شپ کا لگایا ہے۔ انہوں نے پہلی وکٹ کی شراکت میں 236 رنز بنائے جو ٹی ٹوئنٹی کرکٹ کی کسی بھی وکٹ کی سب سے بڑی شراکت داری ہے۔

162 رنز کی طوفانی اننگ کھیلنے والے حضرت اللہ زازئی ٹی ٹوئنٹی کرکٹ میں اتنا بڑا انفرادی سکور بنانے والے دوسرے کھلاڑی بن گئے ہیں۔ اس فہرست میں پہلے نمبر پر آسٹریلیا کے ایرون فنچ ہیں جنہوں نے 2018 میں زمبابوے کے خلاف 172 رنز بنائے تھے۔

حضرت اللہ زازئی نے اپنی اننگ کے دوران 16 چھکے بھی مارے جو ٹی ٹوئنٹی فارمیٹ میں کسی بھی کھلاڑی کی جانب سے مارے جانے والے سب سے زیادہ چھکے ہیں۔

ایک نظر اس پر بھی

ایشز سیریز: پانچویں ٹیسٹ میچ انگلینڈ نےآسٹریلیا کو 135 رنز سے شکست دی، سیریز 2-2 سے برابر

اوول میں کھیلے گئے آسٹریلیا اور انگلینڈ کے درمیان پانچویں ٹیسٹ میچ کے چوتھے روز آسٹریلیا کی ٹیم دوسری اننگ میں 263 رنز بنا کر آؤٹ ہو گئی۔ یوں انگلینڈ نے یہ ٹیسٹ 135 رنز سے جیت کر ایشز سیریز 2-2 سے برابر کر دی ہے۔