کابل، 23؍جون (ایس او نیوز؍ایجنسی) افغانستان میں منگل کی دیر شب آئے شدید زلزلہ میں اب تک 1000 سے زائد افراد کے ہلاک ہونے کی خبریں سامنے آ چکی ہیں۔ زلزلہ نے افغانستان میں زبردست تباہی کا منظر پیدا کر دیا ہے اور اب بھی ہر طرف آہ و بکا کا عالم ہے۔ ڈیزاسٹر مینجمنٹ محکمہ کے ڈپٹی منسٹر مولوی شرف الدین نے دعویٰ کیا ہے کہ 1500 سے زائد لوگ زخمی ہوئے ہیں جن کا مختلف اسپتالوں میں علاج جاری ہے۔ قابل ذکر ہے کہ بدھ کی صبح 255 لوگوں کی ہلاکت کی خبریں سامنے آئی تھیں، لیکن اس کے بعد سے لگاتار مہلوکین کی تعداد میں اضافہ دیکھا گیا۔ اندیشہ ظاہر کیا جا رہا ہے کہ مہلوکین کی تعداد میں مزید اضافہ ہو سکتا ہے۔

واضح رہے کہ زلزلہ کا جھٹکا صرف افغانستان میں ہی نہیں محسوس کیا گیا بلکہ پاکستان کی راجدھانی اسلام آباد کی زمین بھی ڈول گئی۔ ریکٹر اسکیل پر زلزلہ کی شدت 6.1 بتائی جا رہی ہے۔ یو ایس جیولوجیکل سروے کے مطابق زلزلہ کا مرکز افغانستان کے جنوب مشرق میں تھا۔ اس زلزلہ کا سب سے زیادہ اثر افغانستان کے پکتیکا اور خوست علاقہ میں دیکھنے کو ملا۔

پاکستانی میڈیا کے مطابق زلزلہ کے جھٹکے اسلام آباد سمیت کچھ دیگر شہروں میں بھی محسوس کیے گئے، لیکن کسی جانی نقصان کی اطلاع نہیں ہے۔ سوشل میڈیا پر بھی لوگ زلزلہ سے متعلق جانکاریاں دے رہے ہیں۔ کچھ لوگوں نے لکھا ہے کہ زلزلے کے یہ جھٹکے کچھ سیکنڈ تک محسوس ہوئے تھے، جس کی وجہ سے لوگ ڈر کر اِدھر اُدھر بھاگنے لگے تھے۔