نئی دہلی، 24 جون (ایس ا و نیوز/آئی این ایس انڈیا) پیر کو لوک سبھا میں صدر کے خطاب پر بحث شروع ہوئی۔مرکزی حکومت کی جانب سے پرتاپ سارنگی نے بحث کی شروعات کی اور پھر کانگریس کی جانب سے لوک سبھا میں پارٹی کے لیڈر ادھیررنجن چودھری نے جواب دیا۔اس دوران وہ مودی حکومت پر جم کر برسے۔ادھیر رنجن نے کہا کہ مودی حکومت کوئلہ اور 2 جی گھوٹالے میں آج تک کسی کو پکڑ کر نہیں رکھ پائی، جبکہ حکومت کو 6 سال ہو گئے ہیں۔کانگریس لیڈر چودھری نے کہا کہ آج تک کیوں سونیا گاندھی اور راہل گاندھی باہر ہیں، کیوں نہیں انہیں جیل میں نہیں ڈال دیتے، ہم تو چاہتے ہیں کہ ملک کا قانون مضبوط ہو اور قصورواروں پر سخت کارروائی ہو۔شکریہ تجویز پر کانگریس کی طرف سے ادھیر رنجن چودھری نے کہا کہ صدر کی تقریر کا مواد حکمراں جماعت کی جانب سے تیار کیا گیا تھا۔انہوں نے کہا کہ پارلیمانی نظام میں صدر کا خطاب حکومت کی پالیسیوں کی جھلک ہوتی ہے اور مجھے آج اس پر اپنے خیالات رکھنے کا موقع ملا ہے۔انہوں نے کہا کہ وزیر اعظم صرف آپ نہیں ہم سب کے ہیں۔کانگریس ممبر پارلیمنٹ نے کہا کہ سوامی وویکانند سے وزیر اعظم کاموازنہ غلط ہے کیونکہ صرف نام نریندر ہونے سے مماثلت نہیں کی جا سکتی۔چودھری نے کہا کہ ماں گنگا اور گندی نالی کاموازنہ نہیں کیا جا سکتا۔اس پر ایوان میں ہنگامہ شروع ہو گیا۔ادھیر رنجن چودھری نے کہا کہ ویویکانند نے امن اور عالمی اتحاد کا پیغام دیا تھا۔انہوں نے کہا کہ چودھری نے کہا کہ پی ایم مودی بڑے سیلس مین ہیں اور 2014 میں ہم اپنا پروڈکٹ فروخت میں ناکام رہے اور بی جے پی اپنا اچھا ہو یا برا پروڈکٹ  فروخت کرنے میں کامیاب رہی۔غور طلب ہے کہ صدر کے خطاب پر دو دنوں تک بحث چلے گی۔وزیر اعظم نریندر مودی منگل کی شام کو لوک سبھا میں شکریہ تجویز پر ایوان سے خطاب کریں گے۔