ہوناور میں قائم ہوسکتا ہے ایڈیشنل ڈسٹرکٹ سیشنس کورٹ
ہوناور 16/نومبر (ایس او نیوز) کاروار میں واقعی ضلع سیشنس کورٹ میں بڑھتے ہوئے کام کے بوجھ کو کم کرنے کے لئے بھٹکل، ہوناور اور کمٹہ تعلقہ کے لئے ایک اضافی سیشنس کورٹ قائم کرنے کا فیصلہ کیا گیا ہے۔ اور چونکہ ان تین تعلقہ جات کے لئے ہوناورایک مرکزی مقام ہوتا ہے اس لئے امید یہی ہے کہ ایڈیشنل سیشنس کورٹ ہوناور میں ہی قائم ہوگا۔
اگر ہوناور میں ایڈیشنل سیشنس کورٹ قائم ہوتا ہے تو ان تینوں تعلقہ جات کے عوام کے لئے عدالتی ضرورت کے پیش نظر کاروار تک بار بارتقریباً ایک سو سے ڈیڑھ سو کلو میٹر تک لمبا سفر کرنے کی دشواریوں سے چھٹکارہ مل جائے گا۔یہ بات بھی یاد رکھنے کی ہے کہ ہوناور میں جو عدالت ہے اس کی دو سو برس کی تاریخ ہے اورماضی میں اسے ضلع کورٹ ہونے کا اعزاز بھی حاصل ہے۔اس کے علاوہ سشنس کورٹ کے لئے نئی عمارت تعمیر کرنے کے لئے ضروری زمین بھی اس کورٹ کے احاطے میں موجود ہے۔اس سلسلے میں ریاستی ہائی کورٹ کے انتظامی جج کی جانب سے اس مقام کا معائنہ کرنے کے بعد قطعی فیصلہ کیا جائے گا۔