منگلورو،31؍اکتوبر (ایس او نیوز)مرکزی حکومت کی طرف سے  ملک کے اہم  اییر پورٹس کو نجی کمپنیوں کے ہاتھوں میں دینے کی اسکیم کے تحت منگلورو انٹر نیشنل ایئر پورٹ کا انتظام  31اکتوبر سے ’آدانی گروپ‘ نے سنبھال لیا ہے۔ 

ذرائع سے ملی اطلاع کے مطابق  ایئر پورٹ کے انتظامات کو سرکاری ہاتھوں سے نجی ہاتھوں میں سونپنے کی کارروائی حالانکہ 30اکتوبر جمعہ کے دن ہی شرو ع ہوئی تھی جو سنیچر کے دن صبح میں ایک خصوصی پوجا کے ساتھ باضابطہ طور پر مکمل کی گئی ۔ کورونا پروٹوکو ل کا لحا ظ کرتے ہوئےآدانی گروپ کے اعلیٰ افسران کے علاوہ بہت ہی تھوڑی دیر تعداد میں اہم افسران نے اس تقریب میں شرکت کی۔

بتایا گیا ہے کہ اب سے ایک سال تک ایئر پورٹ کے انتظامات  شعبہ جاتی انداز میں آدانی گروپ اور سرکاری افسران کے ذمہ ہونگے ۔خاص طور پر مالیات، آمد و خرچ  اور سوِل ورک کے شعبہ  جات آدانی کے پاس ہوگا جبکہ طیاروں کا شیڈول ، ایئر ٹریفک اور سیکیوریٹی وغیرہ سے متعلق امور ایئر پورٹ اتھاریٹی آ ف انڈیا کی تحویل میں ہونگے۔