بنگلورو28؍ جنوری (ایس او نیوز) معروف ہمہ لسانی فلمی اداکار پرکاش راج آنے والے پارلیمانی انتخابات میں بنگلور سنٹرل پارلیمانی حلقہ سے بطور آزاد امیدوار حصہ لینے گزشتہ ایک ہفتہ سے حلقہ میں عوام کی رائے طلب کرنے میں مصروف ہیں۔حلقہ کے سی وی رامن نگر اسمبلی حلقہ کا دورہ کرتے ہوئے رائے نے مقامی افراد کے بنیادی مسائل کے سلسلہ میں عوام سے بات چیت کی اور اپنی امیدواری کے تعلق سے رائے بھی طلب کی۔اس موقع پر رائے نے بتایا کہ حلقہ کے ہر علاقہ میں عوام مسائل کا شکارہیں، صرف بزرگ ،پنشن حاصل کرنے کے لئے کئی سال سے دفاتر کے چکر کاٹے جارہے ہیں۔ڈرائینج، سڑکوں کا نظام ٹھیک نہیں ہے، راشن ڈپو میں بے قاعدگیاں ودیگر کئی مسائل کا عوام شکار ہیں۔انہوں نے کہا کہ حلقہ کے عوام نے ان کی امیدواری کے فیصلہ کا خیر مقدم کیا ہے اور مکمل حمایت کا یقین دلایا ہے۔رائے نے کہا کہ حلقہ کی بنیادی سہولیات، نوجوانوں کو روزگار، حلقہ کو مثالی بنانے کے سلسلہ میں عوام کے ساتھ تبادلہ خیال کے بعد منشور تیار کرکے عوام کے روبرو پیش کیا جائے گا۔انہو ں نے کہا کہ اس کے بعد عوام کے رائے مشورہ کے تحت انتخابی مہم شروع کی جائے گی۔اس موقع پر پرکاش رائے نے ریاست کے معروف صحافی آنجہانی پی لنکیش کی 19؍ ویں برسی کے موقع پر ان کی سمادھی پہنچ کر خراج عقیدت پیش کیا۔