ممبئی،12؍جولائی(ایس او نیوز؍ایجنسی) ملک بھر میں کورونا وائرس کا قہر جاری ہے اور فلم انڈسٹری بھی اس کی گرفت میں نظر آ رہی ہے۔ امیتابھ بچن اور ابھیشیک بچن کے بعد اب اداکار انوپم کھیر کے گھر میں بھی کورونا سے متاثرہ افراد پائے گئے ہیں۔ انوپم کھیر کی ماں دلاری بھی کرونا سے متاثر ہو گئی ہیں۔ اس بات کی اطلاع انہوں نے ٹوئٹ کر کے دی ہے۔
انوپم کھیر نے ٹوئٹ میں لکھا ’’میری ماں دلاری کورونا پازیٹو پائی گئیں ہیں۔ انہیں کورونا کا ہلکا انفیکشن ہے اور انہیں ممبئی کے کوکیلا بین اسپتال میں داخل کرایا گیا ہے۔ میرے بھائی، بھابی اور بھتیجی بھی محتاط رہنے کے باوجود کورونا سے متاثر پائے گئے ہیں۔‘‘ انوپم کھیر نے بتایا کہ ان کا بھی کرونا ٹیسٹ کرایا گیا ہے، جس کی رپورٹ منفی پائی گئی ہے۔