ملک میں ہجومی تشددکا سلسلہ جاری ، مدھیہ پردیش میں مور کا شکار کرنے کے نام پر ایک شخص کا قتل
بھوپال،20/جولائی (ایس او نیوز/آئی این ایس انڈیا) ملک میں عوامی تشدد کا سلسلہ تھمنے کا نام نہیں لے رہا ہے، ملک کی کسی نہ کسی ریاست سے روزانہ کم از کم ایک شخص کی موت ماب لنچنگ کے نام پر ہورہی ہے اور ریاستی حکومتیں اسے روکنے میں ناکام نظر آرہی ہیں۔ تازہ واردات مدھیہ پردیش کے نیمچ ضلع سے موصول ہوئی ہے جہاں ایک مور کا شکار کرنے کے نام پر ایک شخص کو پیٹنے کا معاملہ سامنے آیا ہے۔نیمچ میں مور چوری کے الزام میں جمعہ کی رات (19 جولائی) کو ہجوم نے ایک شخص کو پیٹ پیٹ کر قتل کر دیا۔یہ واقعہ نیمچ ضلع کے مناسا تحصیل کے ککڑایشور تھانہ تحت گاؤں لسوڑیا اتری گاؤں میں پیش آیا ہے۔
بتایا جارہا ہے کہ چار لوگ مور چرانے کے لئے آئے تھے جس میں سے تین لوگ فرار ہونے میں کامیاب ہو گئے، البتہ ایک شخص کو لوگوں نے پکڑ لیا اور اس کی اتنی بری طرح پٹائی کی کہ اس کی موت واقع ہوگئی۔
واقعے کے بعد اس طرح کی بھی باتیں سامنے آرہی ہیں کہ لوگوں نے ایک شخص کو جان سے مارنے کے بعد مردہ مور کو اُس کے پاس رکھ دیا اور ویڈیوز بناکر اُسے مور چور ثابت کرنے لگے۔ساتھ ہی ایک دڈیو ایسا بھی بنایا گیا جس میں اپنی آخری سانس لیتے ہوئے ایک شخص زمین پر پڑا ہے اور لوگ اس کے ارد گرد مردہ مور ڈال رہے ہیں، مگر اسے اٹھا کر کوئی بھی ہسپتال نہیں لے جارہا ہے۔
معاملہ نوٹس میں آنے کے بعد بتایا جارہا ہے کہ پولیس نے کچھ افراد کو حراست میں بھی لیا ہے۔
بتایا گیا ہے کہ حال ہی میں مدھیہ پردیش کے نیمچ ضلع میں بکرا چوری کرنے کے الزام میں ہجوم نے تین نوجوانوں کی جم کر پٹائی کی تھی اور ان کی موٹر سائیکل کو آگ کے حوالے کر دیا تھا۔معاملہ نوٹس میں آنے کے بعد پولیس نے حملہ آوروں کو گرفتار کرنے اور اُن کے خلاف معاملہ درج کرنے کے بجائے چوری کرنے کے نام پر مار کھاکر زخمی ہونے والے تینوں نوجوانوں کو ہی گرفتار کرلیا تھا پھر عوامی دباو کے بعد میں مارپیٹ کرنے والے پانچ افراد کو پولس نے حراست میں لیا تھا۔