ریاست میں پانچ بدعنوان افسر اے سی بی کے شکنجے میں
بنگلورو29؍دسمبر(ایس او نیوز) بدعنوان سرکاری افسروں کے خلاف اپنی کارروائی کو آگے بڑھاتے ہوئے انسداد کرپشن بیورو نے آج ریاست کے 17 مقامات پر بیک وقت چھاپے مارے اور پانچ بدعنوان سرکاری افسروں کو بے نقاب کردیا ، ان کے پاس سے کروڑوں روپیوں کے غیر قانونی اثاثے وغیرہ ضبط کئے۔ جن افسروں کے ٹھکانوں پر اے سی بی نے چھاپے مارے ان میں شہر کے اڈیشنل رجسٹرار کوآپر یٹیو سوسائٹیز آر ششی دھر، داونگیرے کے محکمۂ زراعت کی ڈپٹی ڈائرکٹر ہمسا وینی ، محکمۂ ٹاؤن پلاننگ بی بی ایم پی کے اسسٹنٹ ڈائرکٹر بیسے ٹپا ، میسور اربن ڈیولپمنٹ اتھارٹی کے جونیئر انجینئر کے منی، اور سرکاری کالج منگلور کے ریڈر منجوناتھ شامل ہیں۔ آر شری دھر ہمسا وینی ، بیسے ٹپا ، اور کے منی کے ٹھکانوں پر داونگیرے اور دیگر مقامات پر چھاپے مارتے ہوئے ان کی املاک وغیرہ ضبط کرلی گئی ۔ شری دھر کے پاس سے غیر منقولہ جائیداد پر مشتمل دستاویزات برآمد کئے گئے۔اس کے علاوہ دانگیرے کے ہرپن ہلی تعلقہ کے تیلگی دیہات میں 15ایکڑ زمین پانچ اسکوٹر ، سونے چاندی کی اشیاء ، برآمد کیں۔ اے سی بی نے سب سے پہلے علی عسکر روڈ پر واقع سری دھر کے دفتر پر دھاوا بولا اس کے بعد دیگر مقامات کو نشانہ بنایا ۔