ضلع شمالی کینرا، منگلورو اور دھارواڑ میں بدعنوان افسران کے خلاف اینٹی کرپشن بیورو کی کارروائی۔جوئیڈا تعلقہ پی ڈبلیو ڈی انجینئرکے ٹھکانوں پر چھاپہ
ڈانڈیلی 13/جون (ایس او نیوز) ضلع شمالی کینرا، منگلورو،دھارواڑ جیسے ریاست کے مختلف مقامات پر اینٹی کرپشن بیوریو نے بدعنوان افسران کے ٹھکانوں پر چھاپہ ماری کی ہے۔ضلع شمالی کینرا میں اے سی بی نشانے پر تعلقہ کے اسسٹنٹ ایکزیکٹیو انجینئر اودئے چھبّی آ گئے۔ ان کی بیلگاوی میں واقع رہائش گاہ اور جوئیڈا میں ان کے دفتر پر اے سی بی کے افسران نے چھاپہ ماری کی اور اہم دستاویزات کا جائزہ لینے کا کام کیا جارہا ہے۔اس کے علاوہ ڈانڈیلی میں ان کے بھائی کے مکان پر بھی چھاپہ مارا گیا ہے، جس میں انجینئر کی والدہ بھی رہائش پزیر ہے۔ اور وہاں سے دستیاب ہونے والے کاغذات کا بھی معائنہ کیے جانے کی خبر ہے۔
پی ڈبلیو ڈی کے اسسٹنٹ ایکزیکٹیوانجینئر اودئے چھبّی پرالزام ہے کہ انہوں نیبدعنوانی کے ذریعے غیر محسوب دولت جمع کررکھی ہے۔ ان خبروں کے پس منظر میں اے سی بی کی تین ٹیموں نے ان کے ٹھکانوں پر چھاپہ مارا تھا۔تعلقہ پی ڈبلیو ڈی کے دفتر پر سی پی آئی وشوا ناتھ کی قیادت میں چھاپہ مارنے والی ٹیم نے لائف انشورنس، موٹر گاڑیوں وغیر ہ سے متعلق دستاویزات کا معائنہ کیا۔جوئیڈا تعلقہ میں محکمے کی طرف سے انہیں فراہم کردہ کوارٹر بھی موجود ہے، جس پر تالا لگا ہواتھا۔ اس لئے بیلگاوی میں اے سی بی ٹیم اپنا کام مکمل کرنے کے بعد چھبّی کی موجودگی میں ہی کوارٹر کا تالا کھلوانے او ر جانچ کرنے کا فیصلہ کیا گیا۔
انجینئر چھبّی کے بارے میں پتہ چلا ہے کہ وہ گزشتہ بیس برسوں سے جوئیڈا، ڈانڈیلی اور ہلیال کے علاقے میں پی ڈبلیو ڈی اورضلع پنچایت میں انجینئر کے بطور خدمات انجام دے رہے ہیں۔ ماضی میں بھی ان پر الزامات لگتے رہے ہیں۔ اس میں ایک اہم معاملے میں اودئے چھبّی اور ان کی بیوی کے بینک اکاؤنٹ میں ایک ٹھیکے دار کے اکاؤنٹ سے لاکھوں روپے ٹرانسفر ہونے کی با ت سامنے آئی تھی۔گمان کیا جارہا ہے کہ اودئے جوئیڈا اور ڈانڈیلی کے کچھ ٹھیکے داروں کے نام پر خود ہی ٹھیکے لینے کا کام انجام دیتے ہیں۔اور ٹھیکے دار کے بینک اکاؤنٹ میں بل کی رقم جمع کروانے کے بعد پھر اسے اپنے یا اپنے قریبی افراد کے کھاتے میں منتقل کروالیتے ہیں۔
منگلورو میں جیولوجی اینڈ مائننگ ڈپارٹمنٹ کے اسسٹنٹ انجینئر مہادیوپّا کے مکان اور دفتر پر بیک وقت چھاپہ ماراگیا۔ یہاں چھاپہ مار ٹیم کی قیادت اے سی پی اوما پرشانت نے کی۔جبکہ مہادیوپّا سے تعلق رکھنے والے بنگلورواورچترادرگہ میں واقع مکانات پر بھی چھاپہ ماری کی گئی۔جہاں پر ملنے والے اہم دستاویزات کی جانچ پڑتال کی جاری ہے۔