بھٹکل میں بارش کے موسم میں کسی کو بھی ندی نالوں اور سمندر میں اُترنے نہ دیں؛ اُترنے کی صورت میں قانونی کاروائی کریں؛ اسسٹنٹ کمشنر کی آفسران کو ہدایت
بھٹکل:25؍جولائی (ایس اؤ نیوز)مسلسل برستی بارش اور سیلاب سے عوام اور جانوروں کو ہونےو الے نقصانات سے تحفط فراہم کرنے اور حفاظتی تدابیر اختیار کرتے ہوئے کارروائی کرنے بھٹکل اسسٹنٹ کمشنر ساجد ملا نے متعلقہ محکمہ جات کے افسران کوتحریری طور پر ہدایات جاری کیں ہیں۔
محکمہ پولس سمیت دیگر محکموں کو نوٹس جاری کرتے ہوئے انہوں نے کہا ہے کہ گزشتہ ایک ہفتہ سے ضلع میں ہورہی مسلسل بارش کے نتیجے میں بھٹکل کی ندیاں ، نالے ، تالاب بھر کر خطرےکی گھنٹی بجارہے ہیں۔ طوفانی ہوائیں بھی جاری ہیں، سمندر میں اونچی اونچی موجیں اٹھ رہی ہیں۔ ان حالات میں بھٹکل کی شرابی ندی سمیت دیگر ندیوں ، نالوں اور سمندر سمیت کہیں پر بھی کسی شخص کو پانی میں اُترنے نہ دیں۔
اسسٹنٹ کمشنر نے سخت ہدایات جاری کرتے ہوئے تعلقہ پنچایت آفسران، میونسپالٹی چیف آفسر اور جالی پنچایت کے آفسران پر زور دیا ہے کہ وہ عوام میں بیداری پیدا کریں کہ ایسے وقت میں پانی میں اُترنا خطرے سے خالی نہیں ہے۔ انہوں نے مقامی انتظامیہ سے کہا ہے کہ وہ عوام کی حفاظت کو یقینی بنانے اور نوجوانوں کو خطرات میں پھنسنے سے بچانے پیشگی اقدامات کریں اور کسی کو بھی پانی میں اُترنے نہ دیں۔ انہوں نے جاری کردہ تحریری ہدایات میں شرابی ندی، چوتھنی برج ، چوتھنی مسجد کی قریبی ندی ، غوثیہ محلہ سے منڈلی اور نستار ، وینکٹاپور ندی، جالی ، ہیبلے اور مرڈیشور سمند، کڈوین کٹا ڈیم اور ساگر روڈ پر واقع گاندھی فالس کا تذکرہ کیا ہے اور ان جگہوں کی خصوصی نگرانی کرنے کی ہدایات دی ہیں اور اگر کوئی پانی میں اُترتا ہے تو اُس کے خلاف قانونی کاروائی کرنے کا حکم دیا ہے۔