منگلورو : فاضل قتل کیس میں استعمال کی گئی کار کا مالک گرفتار - منگلورو نارتھ اسسٹنٹ کمشنر ہونگے تحقیقاتی آفیسر
منگلورو 2 / اگست (ایس او نیوز) سورتکل کے منگل پیٹے میں فاضل نامی نوجوان کا جو قتل ہوا تھا اس واردات میں استعمال کی گئی کار کے مالک اجیت کراستا (44) کو پولیس نے گرفتار کر لیا ہے ۔
پولیس کمشنر ششی کمار نے اس گرفتاری کی اطلاع دیتے ہوئے بتایا کہ فاضل کے قاتلوں نے واردات انجام دینے کے لئے جو کار استعمال کی تھی وہ پڈوبیدری پولیس اسٹیشن کے حدود میں کڈے کونجا نامی مقام پر دستیاب ہوئی تھی ۔ اجیت کراستا دو کاروں اور ایک لاری کا مالک ہے جو دوسروں کو کرایہ پر دیتا ہے ۔ فاضل قتل معاملے ملوث ملزمین میں سے ایک شخص نے یہ کار کراستا سے حاصل کی تھی ۔ اس سے پہلے بھی وہ کئی مرتبہ کراستا سے کار لے جایا کرتا تھا ۔ تفتیش سے پتہ چلا ہے کہ اجیت کراستا کے ساتھ اس ملزم کے گہرے تعلقات ہیں ۔
پولیس کمشنر نے بتایا کہ قتل کا سراغ پانے کے لئے 51 سے زیادہ لوگوں سے پوچھ تاچھ کی گئی ہے ۔ کار کا پتہ لگانے کے لئے علاقے کے سی سی ٹی وی فوٹیج کی جانچ کی گئی ۔ مشتبہ کار کا رجسٹریشن نمبر فوٹیج میں نہ ملنے کی وجہ سے سفید رنگ والی ہونڈائی ایون ماڈل کی 8 کاروں کو تحویل میں لے کر ان کے مالکان سے پوچھ تاچھ کی گئی ۔ جس کے دوران کار کرایے پر دینے والے شخص کے بارے میں تفصیلات معلوم ہوئیں اور اس کی بنیاد پر اجیت کراستا کو گرفتار کیا گیا ۔
بتایا جاتا ہے کہ اس کار کا رجسٹریشن منگلورو آر ٹی او میں اجیت کی بیوی گلانسی ڈمپل ڈیسوزا کے نام پر ہے ۔ اجیت کو ملزم نے ایک اہم کار کے لئے کار استعمال کرنے کی بات کہتے ہوئے کرایہ کے طور پر بڑی رقم دینے کا وعدہ کیا تھا ۔ پولیس ذرائع کا کہنا ہے کہ اجیت کے بیان کی روشنی میں قتل کے ملزمین کی تلاش کی جا رہی ہے ۔ مزید ملزمین کی گرفتاری کے بعد ہی قتل کے اسباب صاف طور پر معلوم ہو سکیں گے ۔
اے ڈی جی پی آلوک موہن نے بتایا کہ فاضل قتل واردات میں استعمال کی گئی کار کے مالک اجیت کراستا کو گرفتار کیا گیا ہے اور اس سے سختی کے ساتھ تفتیش کی جا رہی ہے ۔ اس واردات کو انجام دینے میں کراستا کا کیا رول ہے اس بارے میں ابھی تک واضح بات معلوم نہیں ہوئی ہے ۔
اسی دوران مقتول فاضل کے اہل خانہ کی طرف سے کی جارہی مانگ کو منظور کرتے ہوئے اس قتل کی تحقیقات کے لئے تفتیشی افسر (آئی او) کو بدل دیا گیا ہے اور سورتکل انسپکٹر کی جگہ منگلورو نارتھ کے اسسٹنٹ پولیس کمشنر مہیش کمار کو 'تفتیشی افسر' کی ذمہ داری دی گئی ہے ۔