دہلی میں عآپ کی جیت پر شیوسینا نے کی کیجریوال کی تعریف کہا، بی جے پی رہنماؤں کی فوج کا کیجریوال نے اکیلے مقابلہ کیا
نئی دہلی،12/فروری(آئی این ایس انڈیا) شیوسینا نے بدھ کو کہا کہ عام آدمی پارٹی کے ان کے کاموں کی بدولت اسے دہلی اسمبلی انتخابات میں شاندار جیت ملی۔ جبکہ بی جے پی کی پولرائزیشن کی کوشش قومی دارالحکومت کے ووٹروں کو راس نہیں آئی۔
شیوسینا نے دہلی کے وزیر اعلی اروند کجریوال کی یہ کہتے ہوئے تعریف کی انہوں نے وزرائے اعلی اور مرکزی رہنماؤں سمیت بی جے پی لیڈروں کی فوج کا اکیلے مقابلہ کیا اور تعلیم اور صحت کے شعبے میں اپنی حکومت کی طرف سے کئے گئے کاموں کو کامیابی کے طور پر پیش کیا۔شیوسینا نے کہا کہ یہ غیر معمولی جیت ہے کیونکہ ہندوستان میں انتخابات عام طور پر جذباتی مسائل پر لڑے جاتے ہیں۔
ادھو ٹھاکرے کی زیر قیادت پارٹی نے اپنی سابق حلیف پارٹی بی جے پی پر طنز کستے ہوئے کہا کہ آپ کی جیت ’گھمنڈ اور ہم جو کریں وہی قاعدہ ہے‘ والے رویہ کی شکست کو ظاہر کرتا ہے۔دہلی اسمبلی انتخابات ہارنا اور ملک کی مالیاتی دارالحکومت (مہاراشٹر) میں شیوسینا کا وزیر اعلی بننا مرکزی وزیر داخلہ امت شاہ کے لئے انتہائی دکھی کرنے والاہو گا جو قومی صدر کا عہدہ چھوڑنے کے بعد بی جے پی کی کم از کم ایک جیت کو ترس رہے تھے۔
منگل کو کیجریوال زیرقیادت عام آدمی پارٹی نے دہلی اسمبلی انتخابات میں ایک بار پھر شاندار کامیابی حاصل کی۔نظر ثانی شہریت قانون (سی اے اے) کی مخالفت میں جاری مظاہروں کے درمیان اس مقابلے پر سب کی نظر تھی جہاں آپ نے اہم حریف بی جے پی کو زبردست جھٹکا دیا اور کانگریس کا مکمل طور پر خاتمہ کر دیا۔شیوسینا نے کیجریوال کو فتح کی مبارکباد دیتے ہوئے کہاکہ بی جے پی دہلی اسمبلی انتخابات میں اپنے ممبران پارلیمنٹ، ممبران اسمبلی اور پڑوسی ریاستوں کے وزرائے اعلی کی پوری فوج کے ساتھ اتری تھی لیکن کیجریوال اکیلے ان پر بھاری پڑ گئے۔انہوں نے کہا کہ بی جے پی نے اپنے انتخابی تشہیر کو سی اے اے،ہندو مسلم اور شاہین باغ کو مسلمانوں کی تحریک بتانے جیسے مسائل پر مرکوز رکھا لیکن ووٹر اس پولرائزیشن کے چکر میں نہیں پڑے اور کیجریوال کے حق میں ووٹ دیا۔