بنگلورو، 25؍جولائی (ایس او نیوز) عام آدمی پارٹی (عاپ) نے الزام لگایا کہ داغدار وزیر کے ایس ایشورپا کو دوبارہ کابینہ میں شامل کرنے کے لئے ریاستی بی جے پی نے پولیس پر دباؤ ڈال کر سنتوش پاٹل کی خودکشی، معاملہ میں ایشورپا کو کلین چٹ دیا ہے۔

یہاں فریڈم پارک میں احتجاج کرتے ہوئے عاپ کے سیاسی مشیر چنپا گوڑا نیلور نے اس خیال کا اظہارکیا اوربتایاکہ کنٹراکٹر سنتوش پاٹل کی خودکشی کا معاملہ منظر عام پرآتے ہی ریاستی بی جے پی نمائندوں کی جانب سے 40فیصد کمیشن حاصل کرنے کا انکشاف ہوا۔

انہوں نے کہاکہ خودکشی کے معاملہ کے بعد وزیر برائے دیہی ترقیات کے ایس ایشورپا کو پاٹل کی خودکشی کے لئے ذمہ دار قراردیتے ہوئے احتجاج شروع ہوا جس کے بعد ایشورپا نے استعفےٰ دیا لیکن اب انہیں کلین چٹ دی گئی ہے۔

انہوں نے کہاکہ ایشورپا کو دوبارہ ریاستی کابینہ میں شامل کرنے ریاستی حکومت ہرممکن کوشش کررہی ہے جس کے لئے پولیس پر ہی سخت دباؤ ڈالا گیا ہے۔

انہوں نے کہاکہ سنتوش پاٹل نے خودکشی سے پہلے ایشورپا کو واٹس ایپ میں خودکشی نامہ روانہ کیا جس کی تصدیق پولیس نے کی ہے لیکن اس کے باوجود کلین چٹ دی گئی ہے۔