بنگلورو،19/فروری(ایس او نیوز) الیکٹرانک سٹی اور شرجاپور میں واقع اپنے دفاتر کو جانے کے لئے بسوں کو پکڑنے کے لئے فٹ پاتھوں پر پیدل چلنے اور سلک بورڈ جنکشن کا استعمال کرنے والے ٹیکیوں کا کہنا ہے کہ، یہاں کی سڑکوں پر سے پیدل چل کر جانا ایک خطر ناک معاملہ ہوتا ہے۔راہگیروں کا کہنا ہے کہ یہاں مناسب فٹ پاتھ بھی نہیں پائے جاتے، جس کی وجہ سے لوگ بھاری ٹرافک اژدہام کا شکار چوراہے کی اصل سڑکوں پر اتر کر چلنے کے لئے مجبور ہو تے ہیں، اس پر تکلیف دہ بات یہ ہے کہ اکثر لوگ یہاں سڑک کے کنارے کی جگہوں کو کھلے میں پیشاب پاخانہ کرنے کے لئے بھی استعمال کرتے ہیں، اس کے علاوہ قریب ہی موجود کھلے ہوئے گندے پانی کے نالے سے نکلنے والی بد بو بھی لوگوں کو پریشان کرتی ہے۔اگست 2019 میں فٹ پاتھوں کی دیکھ بھال کے لئے خاص طور پر 33 لاکھ روپیوں کا بجٹ جاری کیا گیا تھا، وارڈ کے کارپوریٹر نے کہا ہے کہ اس سلسلہ میں کام کا آغاز جلد ہی ہوگا، اسی کے ساتھ یہاں موجود برساتی نالے کو بھی کیچڑ اور گاد وغیرہ سے صاف کیاا جا رہا ہے، الیکٹرانک سٹی میں کا م کرنے والے ایک ٹیکی پنا گپتا جو روزانہ مڈیوال سے بس پر سوار ہوتے ہیں کا کہنا ہے کہ ”چونکہ یہاں مناسب فٹ پاتھ نہیں پائے جاتے، ہم اصل سڑک پر اتر کر چلنے کے لئے مجبور ہوتے ہیں، کئی مرتبہ گاڑیوں سامنے کی جانب سے تیز رفتاری کے ساتھ آتی ہیں اور یہ بہت ہی زیادہ خطرناک ہوتا ہے، برساتی نالے کو کھلا چھوڑ دیا گیا ہے اور کئی مقامات پر ریلنگس بھی ٹوٹی ہوئی ہیں ٹوٹی ہوئی پتھر کی سلوں اور زمین سے باہر نکلی ہوئی لوہے کی سلاخوں کی وجہ سے میں خود بھی دو تین مرتبہ زخمی ہو گیا تھا، چونکہ اس مقام پر روشنی کے بلب بھی نہیں پائے جاتے رات کے اوقات میں اس سڑک پر سے گزر نا اور بھی زیادہ مشکل ہو جاتا ہے“۔