بنگلورو،3؍مارچ(ایس او نیو ز؍پی ٹی آئی) پیر سے کرنا ٹک میں عوام کے لیے ٹیکہ اندازی مہم کا آغاز ہو گیا اور عام زمرہ میں 97 سالہ شخص ٹیکہ لینے والا پہلا شخص بنا۔ 16 ؍جنوری سے طبی کارکنوں اور فرنٹ لائن ورکرس کے لیے ٹیکہ اندازی مہم کے بعد اگلے مرحلے کا پیر سے آغاز ہوا جس میں 60 سال سے زائد عمر اور دیگر عوارض میں مبتلا 45 سال سے زائد عمر کے تمام شہریوں کو ٹیکہ دیا جارہا ہے۔ خانگی منی پال دواخانہ پر معمرشہریوں کو ٹیکہ لینے کے لیے ماسک پہنے قطار میں دیکھا گیا ۔ بعض استفاده کنندگان وہیل چیئر پر آئے تھے۔
منی پال ہاسپٹلس نے اپنے بیان میں کہا کہ 97 سالہ ر اما سوامی پارتھا ساتھی کو سب سے پہلے ٹیکہ دیا گیا۔‘‘ دواخانہ نے معمر شہریوں اور دیگر عوارض میں مبتلا 45 سال سے زائد عمر کے شہریوں سے ٹیکہ اندازی کے لیے خود کا اندراج کرنے کی اپیل کی ۔ دواخانہ نے کہا کہ ہم نے منی پال ہاسپٹلس میں آج سے ٹیکہ اندازی مہم کا آغاز کر دیا۔ ٹیکہ اندازی کے لیے کو ون ایپ کے ذریعہ آن لائن اندراج کیا جاسکتا ہے اور 60 سال سے زائد عمر کے افراد ٹیکہ اندازی کے لیے راست طور پر رجوع ہوسکتے ہیں ۔ دواخانہ حکومت سے تعاون کرر ہا ہےارو ٹیکہ اندازی مہم کے لیے تمام معیاری پروٹو کولس اور اقدامات پرعمل کر رہا ہے۔
دریں اثناء سرکاری دواخانوں نے بھی ٹیکہ اندازی کی تیاریاں شروع کردیں۔ بنگلورو میڈیکل کا مچ اینڈ ریسرچ انسٹی ٹیوٹ کے ڈائرکٹر اور ڈین ڈاکٹرسی آر جینتی نے پی ٹی آئی کو بتایا کہ ’’ آج ہمیں حکومت سے ہدایت وصول ہوئی ہے ۔ ہم آج سے اندراج کا عمل شروع کر رہے ہیں اور تیاریاں مکمل ہوتے ہی ٹیکہ اندازی مہم کا آغاز کر دیں گے ۔‘‘ریاستی حکومت نے کہا کہ تمام تعلقہ اور ضلع کے دواخانوں میں ٹیکہ اندازی ہوگی اور ہر ضلع میں دو خانگی خانوں کی بھی نشاندہی کی گئی ہے۔ ریاستی محکمہ صحت کے مطابق سرکاری دواخانوں میں ہر پیر، چہارشنبہ ، جمعہ اور ہفتے جبکہ خانگی دواخانوں میں تمام ایام کا ر میں ٹیکہ اندازی ہوگی ۔