کاروار :یکم جون (ایس اؤ نیوز)لاک ڈاؤن کی وجہ سے اترکنڑا ضلع کے مختلف مقامات پر پھنسے ہوئے مغربی بنگال کے 967مہاجر مزدوروں کو اترکنڑا ضلع انتظامیہ نے خصوصی ٹرین کا انتظام کرتے ہوئے پیر کو ریلوے اسٹیشن پر انہیں الوداع کیا۔ ضلع انتظامیہ نے مزدوروں کو ان کے شہر پہنچانے کے لئے ’شرمک ایکسپرس ‘ ٹرین کا انتظام کیاتھا۔
پیر کو دوپہر 2.11بجے کاروار کے شرواڑ ریلوے اسٹیشن سے 967 مغربی بنگال کے مزدوروں کو لے کر خصوصی ٹرین نکلی۔ جو مغربی بنگال کے پرولیا جائے گی۔ خصوصی ٹرین میں نشستوں کو موقع رہنے کی وجہ سے اُڈپی کے 250اورمنگلورو جنکشن سے 72 مزدوروں کو بھی اس ٹرین پر سفر کرنے کا موقع دیاگیا ۔ شرواڈ سے نکلی خصوصی ٹرین میں کل 1289مسافر سفر کرنے کی کونکن ریلوے رابطہ عامہ افسر سدھا کرشنا مورتی نے جانکاری دی ہے۔
ٹرین کو ہری جھنڈی دکھانے کے وقت ڈپٹی کمشنر ڈاکٹر ہریش کمار، سماجی فلاح وبہبودی افسر پرشوتم ، کونکن ریلوے کے زونل مینجر بی بی نکم موجود تھے۔