مینگلور 7/اپریل (ایس او نیوز)کرناٹک کی سرحد سے لگے کیرالہ کے کاسرگوڈ میں کورونا وائرس کاقہر ابھی تھمتا نظر نہیں آرہا ہے۔ 6اپریل کی شام تک کی جو صورتحال ہے اس کے مطابق کورونا وائرس سے متاثر ہونے کے مزید9معاملات سامنے آئے ہیں جس کے ساتھ ضلع میں جملہ مریضوں کی تعداد 151ہوگئی ہے۔

خیال رہے کہ 5اپریل کے دن صرف ایک ہی پوزیٹیو معاملہ سامنے آیا تھا جس سے کچھ راحت محسوس کی گئی تھی، لیکن دوسرے ہی دن ایک ساتھ9 معاملات میں رپورٹ پوزیٹیو آنے سے یہاں کی صورتحال کافی سنگین ہوگئی ہے۔کورونا وائرس کے جو نئے کیس سامنے آئے ہیں ان میں 6مرد اور 3خواتین شامل ہیں۔

موصولہ رپورٹ کے مطابق کاسرگوڈ میں کوروناوباء سے پیدا ہونے والے حالات پر قابو پانے کے لئے میڈیکل کالج کے احاطے میں خصوصی اسپتال قائم کیاگیا ہے۔ اس میں ضلع انتظامیہ کا تعاون کرنے کے لئے تھیرواننت پورم کے سرکاری میڈیکل کالج سے ایک طبی ٹیم یہاں پہنچ گئی ہے۔اس میں 10ڈاکٹر، 10نرسیں اور 10نرسنگ اسسٹنس شامل ہیں۔