کاروار کمس سے ڈسچارج مزید نو لوگ بھٹکل پہنچ گئے
بھٹکل 28/مئی (ایس او نیوز) مینگلور فرسٹ نیورو اسپتال کے رابطے کے بعد بھٹکل کے جن 29 لوگوں میں کورونا کے اثرات پائے گئے تھے وہ تمام لوگ اب مکمل صحت یابی کے بعد اسپتال سے ڈسچارج ہوچکے ہیں۔ پتہ چلا ہے کہ آج جمعرات کو نو لوگ کاروار سے بھٹکل پہنچے جس کے ساتھ ہی مینگلور رابطے کے کورونا سے متاثرہ تمام لوگ اسپتال سے ڈسچارج ہوگئے ہیں۔
آج میڈیکل کالج اسپتال سے ڈسچارج ہونے والوں میں ایک 73سالہ معمر خاتون کے علاوہ ایک پانچ ماہ اور ایک دو سال کی بچی بھی شامل ہے۔آج بھی اسپتال سے ڈسچارج ہونے پر میڈیکل کالج اسپتال کے احاطے میں ڈاکٹروں اور دیگر طبی عملے نے تماموں کو الوداع کہا۔
بتایا گیا ہے کہ آج جو لوگ بھٹکل پہنچے ان میں سے اکثر لوگوں کی رپورٹس پہلے ہی نیگیٹو آچکی تھی، مگر کسی کے والد، کسی کی ماں اور کسی کے دوسرے رشتہ دار کی رپورٹ آنے کے انتظار میں وہ لوگ بھٹکل نہیں آئے تھے، آج جب دیگر کی بھی رپورٹس موصول ہوگئی تو تمام لوگوں کو ایک ساتھ اسپتال سے ڈسچارج کیا گیا۔
یاد رہے کہ اب بھٹکل کا صرف ایک 27 سالہ نوجوان کاروار کمس میں ایڈمٹ ہے جو مہاراشٹرا سے مرڈیشور پہنچا تھا، اُس کی رپورٹ کورونا پوزیٹو آنے کے بعد اسے 18 مئی کو کاروار اسپتال شفٹ کیا گیا تھا۔
خیال رہے کہ اب تک بھٹکل کے جملہ 41 لوگ کورونا سے متاثر پائے گئے تھے جس میں سے 40 لوگ مکمل طور پر صحت یاب ہوکر واپس بھٹکل پہنچ چکے ہیں۔