ایس ایس ایل سی امتحان کی تیاری میں طلباء ابھی سے جٹ جائیں، راوں سال8.48لاکھ سے زائد طلباء امتحان میں حصہ لیں گے: سریش کمار
بنگلورو،21/جنوری(ایس او نیوز) ریاست میں امسال ایس ایس ایل سی کے امتحان کے لئے ریاست بھر میں 848192طلباء حصہ لیں گے۔ تمام 30اضلاع کے 14375 مراکزمیں امسال امتحان کروانے کے لئے انتظامات کئے جا رہے ہیں۔ امتحان کے دوران نقل نویسی اور دھاندلیوں کو قابو میں رکھنے کے لئے سی سی ٹی وی کیمروں کی نگرانی برقرار رکھی جائے گی۔ رواں سال27مارچ سے9اپریل تک کروائے جائیں گے۔ ریاستی وزیر برائے بنیادی و ثانوی تعلیم سریش کمار نے پیر کے روز یہ اعلا ن کیا۔ ایک اخباری کانفرنس میں انہوں نے کہا کہ ریاست بھر میں اس امتحان کے لئے رواں سال 79760اساتذہ کی خدمات حاصل کی جائیں گی۔ انہوں نے کہا کہ جوابی پرچوں کی جانچ کا کام 19اپریل سے شروع کیا جائے گا۔وزیر اعظم مودی کی طرف سے پریکشا پہ چرچہ پروگرام کے اہتمام کو طلباء کے لئے انتہائی مفید قرار دیتے ہوئے سریش کمار نے کہا کہ اس پروگرام کی مدد سے طلباء میں امتحان کا خوف دور کرنے میں کافی مدد ملی ہے۔شہر کے راجہ جی نگرمیں پیر کے روز ایک اسکول میں 500سے زائد طلباء نے پریکشا پہ چرچا پروگرام کا مشاہدہ کیا۔سریش کمار نے کہا کہ امتحان ابھی 66دن دور ہے اس کی تیاری کے لئے طلباء ابھی سے روزانہ کی بنیاد پر ٹائم ٹیبل تیار کرکے اس کے مطابق امتحان کی تیاری میں لگ جائیں۔انہوں نے کہا کہ رواں سال امتحان کی تیاری کے متعلق طلباء کی رہنمائی کے لئے فون ان پروگرام کا اہتمام 28جنوری کو کیا جائے گا۔اس پروگرام میں امتحان کے بارے میں سوالات اور شکوک و شبہات کا ازالہ کیا جائے گا۔ اس موقع پر ایجوکیشن کمشنر جگدیش اور دیگر افسر موجود تھے۔