اترکنڑا ضلع کے لئے 15090کوویڈ انجکشن کی سپلائی : 16جنوری سے ویکسن لگانے کا عمل شروع
کاروار:15؍جنوری (ایس اؤ نیوز)بیلگام ڈویزن کے اترکنڑا ضلع کو 15090ڈوز کووڈ انجکشن کا حصہ دیا جاچکاہے۔ جس میں 7000 انجکشن پہلے مرحلے کے طورپرکاروارپہنچ جانے کی ڈپٹی کمشنر ڈاکٹر ہریش کمار نےجانکاری دی ہے۔
ڈی سی نے اس سلسلے میں تفصیلات بتاتے ہوئے کہاکہ پہلے مرحلے میں صحت عامہ کے عملے ، آنگن واڑی اور آشا کارکنان، محافظاتی دستوں سمیت کل 13ہزار لوگوں کو کوویڈ انجکش دئیے جائیں گے پھر اس کے بعدمرحلہ وار عوام تک پہنچیں گے۔ فی الحال ضلع میں 11 مراکز بنائے گئے ہیں۔ جہاں تعلقہ وار سطح پر یومیہ 100کے حساب سے ضلع میں 1100لوگوں کو ہردن انجکشن لگایا جائے گا۔ ایک مرکز پر ایک پولس سمیت پانچ عملے کے حساب سے کل 515عملہ تعینات کیاگیا ہے۔ 105جگہوں پر کولڈ اسٹوریج کا انتظام کیاگیا ہے۔ ضلع میں 105آئس لائنڈ ریفریجیٹر ، محکمہ مویشی پالن سے 18اس طرح جملہ 123 اسٹوریج کا انتظام کیا گیا ہے۔
محکمہ صحت عامہ سے 1اور محکمہ مویشی پالن سے 2واک ان کولر لئے گئے ہیں جس کی مدد سے انجکشن کی سپلائی ہوگی۔ اس سلسلےمیں محکمہ جات کے افسران کے ساتھ میٹنگ کرتے ہوئے انہیں ہدایات دی گئی ہیں۔ڈپٹی کمشنر نے بتایاکہ 16جنوری کی صبح سب سے پہلے میونسپالٹی کے ورکروں کو انجکشن دینے کے بعد صحت عامہ کے عملے کو ویکسین دئے جائیں گے۔
بتایا گیا ہے کہ وزیر اعظم نریندر مودی کل 16جنوری کو کووڈ-19ویکسنیشن کا ورچوئیل افتتاح کریں گے جس کے بعد تمام علاقوں میں ویکسی نیشن کا عمل شروع کیا جائے گا۔