بیلگام میں تیز رفتار کار کا ٹائر پھٹ گیا؛ پلٹیاں کھاکر لاری سےٹکر؛ ساتوں ہلاک
بیلگام 3/جون (ایس او نیوز) یہاں نیشنل ہائی 4 شری نگر نامی مقام پر پیش آئے ایک بھیانک سڑک حادثہ میں ایک کار پر سوار ساتوں نوجوان ہلاک ہوگئے جن کا تعلق مہاراشٹرا کے اورنگ آباد کے دیوگیری سے تھا۔
حادثہ اتواردوپہر کو اُس وقت پیش آیا جب یہ سبھی دوست ایک کار پر سوار اورنگ آباد سے کولہاپور ہوکر گوا جارہے تھے کہ بیلگام کے مضافات میں اچانک ان کی تیز رفتار کار کا ایک پہیہ پھٹ گیا، ٹائر پھٹتے ہی کار بے قابو ہوگئی اور روڈ کےڈیوائیڈر سے ٹکراکر پلٹیاں کھاتے ہوئے روڈ کے دوسری جانب جاگری، جس کے دوران مخالف سمت سے آنے والی ایک تیز رفتار ٹرک نے ان کی کار کو روند دیا۔
حادثہ اتنا بھیانک تھا کہ کار کے پرخچے اُڑگئے اور پانچ لوگوں نے موقع پر ہی دم توڑ دیا، جبکہ دیگر دو لوگوں نے اسپتال پہنچنے کے بعد اپنی آخری سانس لی۔ مرنے والے سبھی نوجوان 25 اور 32 سال کے تھے اور ایک دوسرے کے دوست تھے۔ جن کی شناخت مہیش نندو پاڈلے، امول نیلے، نندو پوار، گوپی ورکڈ، سُریش کانیری، امول چورے اور مہیش کی حیثیت سے کی گئی ہے۔
ذرائع سے ملی اطلاع کے مطابق حادثے میں لاری ڈرائیور یا کلینر کو معمولی چوٹ بھی نہیں آئی ہے۔
حادثے کی اطلاع ملتے ہی مال ماروتی پولس تھانہ کے اہلکار جائے وقوع پر پہنچے، بعد میں بیلگام پولس کمشنر بی ایس لوکیش کمار، ڈی سی پی یشودھا، اے سی پی این وی بھرمنے سمیت پولس کے دیگر اہلکار بھی موقع پر پہنچے اور جائےوقوع کا جائزہ لیا۔
کچھ دیر کے لئے نیشنل ہائی وے بند ہوگیا تھا، مگر بعد میں ٹریفک پولس نے نظام سنبھا ل لیا۔
بتایا گیا ہے کہ حادثے کے فوری بعد لاری ڈرائیور ٹرک چھوڑ کر فرار ہوگیا۔ مال ماروتی پولس تھانہ میں معاملہ درج کیا گیا ہے اور پولس پورے واقعے کی چھان بین کررہی ہے۔