مغربی سنگھ بھوم کے برگلی کیلا گاؤں کے واقعہ سے مجروح ہوں:ہیمنت سورین
نئی دہلی،22جنوری(آئی این ایس انڈیا) جھارکھنڈ کے وزیر اعلی ہیمنت سورین نے مغربی سنگھ بھوم کے برگلی کیرا گاؤں میں سات دیہاتیوں کی پتھل گاڑی حامیوں کی طرف سے کئے گئے بے رحمانہ قتل کے واقعہ کو بدقسمتی قرار دیتے ہوئے گہری تشویش اور افسوس کا اظہار کیا ہے۔سرکاری ترجمان نے رانچی میں بتایا کہ وزیر اعلی ہیمنت سورین نے نئی دہلی سے جاری بیان میں کہاکہ اس واقعہ سے میں مجروح ہوں۔ وزیر اعلی نے کہا کہ قانون سب سے اوپرہے اور قصورواروں کو بخشا نہیں جائے گا۔ریاست کی پولیس تحقیقات کر رہی ہے، قصورواروں پر جلد سے جلد کارروائی ہوگی اور ایسا واقعہ دوبارہ نہ ہو اس کے لئے وہ آج تمام متعلقہ حکام کے ساتھ اعلی سطحی جائزہ کریں گے۔قابل ذکر ہے کہ وزیر اعلی گزشتہ دو دنوں سے نئی دہلی میں ہی قیام کر رہے ہیں۔غور طلب ہے کہ جھارکھنڈ کے مغربی سنگھ بھوم ضلع میں نکسل متاثرہ گدڑی ڈویژن کے برگلی کیرا گاؤں میں پتھل گاڑی حامیوں نے پتھل گاڑی کی مخالفت کرنے والے ایک پنچایت نمائندہ سمیت سات دیہاتیوں کی لاٹھی، اور ٹاگی سے حملہ کرکے بے رحمانہ قتل کر دیا جبکہ کم از کم دو دیہی لاپتہ بتائے جا رہے ہیں۔سابق رگھوور داس نے ریاست میں پتھل گاڑی حامیوں کے خلاف 2018 میں سخت کارروائی کی تھی اور اس کے رہنماؤں کی بڑے پیمانے پر دھر پکڑ کرکے ان کے خلاف سرکاری کام کاج میں رکاوٹ ڈالنے اور آئین کی خلاف ورزی کرنے کے الزام میں غداری کے بھی مقدمے درج کروائے تھے۔ریاست میں ہیمنت سورین کی حکومت کے قیام کے بعد کابینہ کی پہلی میٹنگ میں پتھل گاڑی حامیوں پر درج تمام مقدمات واپس لینے کا فیصلہ ریاستی حکومت نے لیا تھا۔