واشنگٹن،29؍اپریل(ایس او نیوز؍یو این آئی) امریکہ کی کیلیفورنیا میں سان ڈیاگو بحری اڈے میں جنگی جہاز یو ایس ایس کڈ پر تعینات 64 فوجی مہلک کورونا وائرس ’ كووڈ 19‘ کی جانچ رپورٹ میں مثبت پائے گئے ہیں۔ واشنگٹن کے اخبار ڈیلی ہیرالڈ کی رپورٹوں کے مطابق جنگی جہاز پر عملے کے ارکان سمیت تقریباً 300 افراد ہیں اور منگل کو 63 فیصد افراد کی جانچ کی گئی تھی۔
میڈیا رپورٹ میں لیفٹیننٹ کمانڈر میگن اسحاق کے حوالے سے کہا گیا ہے کہ سبھی کی جانچ کی جائے گی۔ بحریہ کے دفتر نے یہ اطلاع فراہم کی ہے۔ رپورٹ میں کہا گیا کہ جہاز کو سان ڈیاگو میں سینیٹائز اور صاف کیا جا رہا ہے جبکہ عملہ ارکان کو آئیسولیشن اور قرنطینہ مرکز میں رکھا گیا ہے۔
امریکہ کا یہ دوسرا جنگی جہاز ہے جو کورونا وائرس سے متاثر ہوا ہے جبکہ طیارہ بردار جنگی جہاز یو ایس ایس تھیوڈور روزویلٹ سمندر میں تعینات ہے۔ كڈ جنگی جہاز مشرقی الکاہل میں بڑھتی ہوئی اسمگلنگ روکنے کے لئے حال ہی میں تعینات کیا گیا ہے۔