کوپّل،29/ مئی (ایس او نیوز) کوشٹگی تعلقہ کے کلکیری کے قریب نیشنل ہائی وے 50 پر لاری اور کار کے بیچ ہوئے خطرناک تصادم  میں 6 افراد موقع پر ہی ہلاک ہوگئے۔ 

مہلوکین کی شناخت راجپّا بنگوڈی، راگھویندرا، اکشئے شیو شرن، جئے شری، راکھی اور رشمیکا کے طور پر کی گئی ۔ بتایا جاتا ہے کہ کار پر سوار تمام لوگ  وجئے پورا سے بنگلورو کی طرف سفر کر رہے تھے ۔ اس دوران ان کی کار کا ٹائر پھٹ گیا جس کی وجہ سے کار بے قابو ہوگئی اور سڑک کی دوسری طرف سے آ رہی لاری سے ٹکرا گئی۔ ٹکر اتنی تیز تھی کہ کار کا آدھے سے زیادہ حصہ لاری کے اندر گھس گیا اور کار پر سوار تمام چھ لوگ موقع پر ہی ہلاک ہوگئے۔
    
وزیر اعلیٰ سدارامیا نے اس حادثے پر گہرے دکھ کا اظہار کرتے ہوئے ہلاک ہونے والوں کے اہل خانہ کو  حکومت کی طرف سے فی کس 2 لاکھ روپے معاوضہ دینے کا اعلان کیا ہے ۔ 
    
حادثہ کی اطلاع ملنے پر پولیس سپرنٹنڈنٹ سمیت دیگر افسران نے جائے وقوع پر پہنچ کر معائنہ کیا۔ کوشٹگی پولیس اسٹیشن میں کیس درج کیا گیا ہے۔