پاکستان: کوئلے کی کان میں دھماکہ، 6 مزدور ہلاک
اسلام آباد، 5؍دسمبر (ایس او نیوز؍ایجنسی) پاکستان کے جنوب مغربی صوبہ بلوچستان کے ضلع ہرنائی میں کوئلے کی کان میں ایک زبردست گیس دھماکے میں کم از کم چھ مزدور ہلاک ہو گئے۔ میڈیا کو یہ معلومات دیتے ہوئے حکام نے بتایا کہ تقریباً 7 گھنٹے کی کوشش کے بعد تمام مزدوروں کی لاشیں نکال لی گئی ہیں۔
حکام نے بتایا کہ ہفتہ کو ضلع میں شاہراگ کوئلہ کان کے اندر چھ مزدور کام کر رہے تھے کہ کان میں زور دار دھماکہ ہوا، جس کی وجہ سے اس کا ایک حصہ منہدم ہو گیا، جس میں چھ مزدوروں کی موت ہو گئی۔ دھماکہ اتنا زوردار تھا کہ دھماکے کی آواز دور تک سنائی دئی۔
حکام نے بتایا کہ کان کے اندر تقریباً 1500 فٹ گہرائی میں گیس کے زبردست دھماکے کے بعد آگ لگ گئی جس سے کان کا داخلی دروازہ بند ہو گیا۔ سنہوا نیوز ایجنسی نے رپورٹ کیا کہ آگ لگنے کے نتیجے میں، مزدور کان کے اندر پھنس گئے اور دم گھٹنے اور جھلسنے سے ان مزدوروں کی موت ہوگئی۔
مقامی میڈیا نے بتایا کہ حادثے کے فوراً بعد سماجی کارکن اور علاقے کے امدادی کارکن موقع پر پہنچ گئے اور امدادی کارروائی شروع کر دی۔ سات گھنٹے کے آپریشن کے بعد مزدوروں کی لاشیں نکال لی گئیں ہیں۔ مزدوروں کی موت کی خبر سنتے ہی ان کے اہل خانہ میں کہرام مچ گیا۔