بھٹکل انجمن پی یوکالج میں 52ویں سالانہ کھیل مقابلوں کا انعقاد
بھٹکل:30؍نومبر(ایس اؤ نیوز)انجمن پی یوکالج بھٹکل کی جانب سے 30نومبر 2019بروز سنیچر کو انجمن گراؤنڈ میں 52ویں سالانہ کھیل مقابلوں کاانعقاد ہوا۔
انجمن کے الومنی ،یونیورسٹی بلیو محمد ایاد ابن نذیر احمد قاسمجی نے بطور مہمان خصوصی پرچم کشائی کی، طلبا کھلاڑیوں سے سلامی لینےکے بعد کھیل مقابلوں کے افتتاح کرنے کا اعلان کرتے ہوئے طلبا و کھلاڑیوں سے خطاب کرتے ہوئے کہاکہ کھیل میں جیت یا انعام اہم نہیں ہوتاہے بلکہ کھیل میں شرکت کرنا ، حصہ لینا، مقابلہ کرنا ہی انسانی زندگی کی کامیابی کی شروعات ہے۔ ہار اور جیت کا سوچے بغیر اپنے کام کو انجام تک پہنچانے کی فکرکریں تو کامیابی ضرور ملے گی۔ زندگی کی ترجیحات ہوتی ہیں ان میں کھیل اورپڑھائی ساتھ ساتھ چلتے ہیں موجودہ دور میں پڑھائی کی طرف زیادہ توجہ دینا اہم ہونے کا خیال ظاہر کیا۔ انہو ں نے کئی مشہور شخصیات کی مثال اور واقعات کو پیش کرتے ہوئے کہاکہ طلبا سے کہاکہ زندگی میں سادگی کا اپنائیں ، سادگی ہی ہمیں ترقی کی منازل طئے کراتی ہیں ۔
جلسہ کی صدارت کرتے ہوئے اسکول بورڈ سکریٹری آصف دامودی نے طلبا کےڈسپلن کی ستائش کی اورہدایات سے نوازتے ہوئے کہاکہ طلبا کو ہر وقت آگے بڑھنے کی فکر کرنی چاہئے ، جس کے لئے ڈسپلن بہت ضروری ہوتاہے، آج جس طرح کا مظاہرہ ہم نے دیکھا ہے اس کو جاری رکھتے ہوئے ترقی کی منازل طئے کرنےکی دعائیں دیں۔ کالج نائب پرنسپال پروفیسر عبدالرحیم خان نے مہمان کا بہترین اندازمیں تعارف پیش کرتے ہوئے استقبالیہ و افتتاحی کلمات کو پیش کرتےہوئے کالج کھلاڑیوں کی کارکردگی پر روشنی ڈالی۔
تقریب کا آغاز پی یو سائنس اول کے متعلم حسن رباح کی تلاوت قرآن سے ہوا۔ پی یو کامرس اول کے احمد خان نے کھلاڑیوں کو حلف کی خواندگی کرائی ۔ پروفیسر اسماعیل غسان اور پروفیسر نرنجن ہیگڈے نے نظامت کی تو پروفیسر عبدالرووف سونور نے شکریہ اداکیا۔ کالج کے فزیکل ڈائرکٹر کے کلیم اللہ کی نگرانی میں کھیل مقابلے ہوئے۔جن کا کالج پروفیسروں نے بھرپور تعاون کیا۔ ڈائس پر انجمن حامئی مسلمین بھٹکل کے جنرل سکریٹری اسماعیل صدیق، کالج بورڈ سکریٹری محمد محسن شاہ بندری، عبدالرحمن صاحب موجود تھے۔