سرسی : ضلع اُترکنڑا میں 500 پیدل پُل تعمیر کرنے رویندرا نائک کا وزیر اعلیٰ بومئی سے مطالبہ
سرسی 11 / جنوری (ایس او نیوز) سوشیل ایکٹیوسٹ رویندرا نائک نے وزیر اعلیٰ بسوا راج بومئی سے مطالبہ کیا ہے کہ 15 جنوری کو سرسی آمد کے موقع پر ضلع کے دیہاتوں میں 500 پیدل پُل تعمیر کرنے کا اعلان کریں ۔
انہوں نے بتایا کہ ضلع شمالی کینرا 10.571 اسکوائر کلو میٹر پر پھیلا ہے جس میں 5,500 اسکوائر کلو میٹر زمین جنگلات، پہاڑیوں اور ندی نالوں سے بھری ہوئی ہے ۔ ملک کی آزادی کو 7 دہائیاں گزرنے کے بعد بھی ضلع کے دیہاتوں میں رابطے کے وسائل کی ابھی بھی کمی موجود ہے ۔ پہاڑی اور چٹانی علاقوں میں بسنے والے لوگ جوڑنے والے راستوں کی کمی ہونے کی وجہ سے بنیادی سہولتوں سے محروم ہیں ۔
چھوٹے چھوٹے گاوں اور قریوں کو جوڑنے کے لئے نہروں اور نالوں کے اوپر پیدل پُل نہ ہونے کی وجہ سے گاوں کے لوگوں اور خاص کر طلبہ کو بڑی دشواریوں کا سامنا کرنا پڑتا ہے ۔ یہ لوگ خود ہی اپنے یہاں دستیاب لکڑیوں ، درختوں کے تنوں اور دوسری چیزوں سے عارضی پیدل پُل بنا لیتے ہیں اور اسی کو آمد و رفت کا ذریعہ بناتے ہیں ۔ اس طرح کے پیدل پُلوں کی سب سے زیادہ ضرورت ضلع کے دوسرے مقامات کے مقابلے میں سرسی اور سداپور تعلقہ جات میں نظر آ رہی ہے ۔
رویندرا نائک نے کہا کہ اس پس منظر میں آئندہ ہفتہ سرسی کا دورہ کرنے والے وزیر اعلیٰ بومئی کو چاہیے کہ وہ ضلع کے عوام کے لئے ایک خصوصی تحفہ کے طور دیہی علاقوں میں کم از کم 500 پیدل پُل تعمیر کرنے کا اعلان کریں ۔