ممبئی، 25؍اپریل (ایس او نیوز؍ایجنسی) ممبئی سے ایک اچھی خبر یہ آ رہی ہے کہ کل ایک دن میں کورونا کےمعاملوں میں 20 فیصد کی کمی درج ہوئی ہے اور یہ کمی ایک دن کی نہیں ہے بلکہ جب سے لاک ڈاؤن نافذ ہوا ہے تب سے کورونا کے معاملوں میں50 فیصد کی کمی درج ہوچکی ہے۔

واضح رہے ہفتہ کے روز ممبئی میں 5,888نئے معاملہ رپورٹ ہوئے ہیں جو 4 اپریل کو سب سے زیادہ11,163 سے آدھےتھے یعنی یہ گزشتہ تین ہفتوں میں سب سے کم ہے اور اگر اس کمی کو فیصد میں دیکھیں تو یہ پچاس فیصد کی کمی ہے ۔ واضح رہےکہ 19 اپریل سے مستقل یہ تعداد آ ٹھ ہزار کےآس پاس تھی۔ ویسے تو لاک ڈاؤن کے بعد سے ریاست مہاراشٹر میں بھی کورونا کے نئے معاملوں میں کمی دیکھی جارہی ہے۔

ریاست مہاراشٹر میں کورونا کا قہر سب سے زیادہ اور سب سے خطرناک تھا لیکن ریاستی حکومت کےبروقت اقدام کے نتائج اب نظر آ رہےہیں۔ ریاست میں کورونا متاثر ہونےکی شرح میں بھی 15 فیصد کی کمی درج ہوئی ہے۔ مہاراشٹر میں کورونا سےایک دن میں سب سے زیادہ اموات ہوئی تھیں لیکن اس میں بھی کمی کا رجحان ہے۔

وزیر اعلی ادھو ٹھاکرے نےریاست میں لاک ڈاؤن کا نام نہیں لیاتھا لیکن جو پابندیاں عائد تھیں وہ لاک ڈاؤن جیسی ہی تھیں ۔ ادھو نےریاست میں سخت پابندیاں نافذکی ہوئی ہیں اور اس پرسختی سےعمل کیا جارہا ہے۔حزب اختلاف بی جےپی نے ادھو ٹھاکرےکی سخت تنقید کی ہے لیکن عوام کا ساتھ انہیں نہیں ملتا نظر آ رہا کیونکہ عوام ایسے ماحول میں سیاست کرنےوالوں کےساتھ کھڑی نہیں ہو رہی ہے۔