کاروار29/اپریل(ایس او نیوز) کاروار کے پانچ سال کی چھوٹی سی عمر کے لڑکے نے ’اسپننگ اسکیٹنگ‘ میں ورلڈ ریکارڈ قائم کرتے ہوئے اپنے شہر اورضلع کا نام دنیا میں روشن کردیا ہے۔

کاروار کے اجّی ہوٹل کے احاطے میں منعقدہ لِمبو اسپننگ اسکیٹنگ مقابلے میں کائیگا رولر اسکیٹرس کی نمائندگی کرنے والے محمد ثاقب نے مسلسل 25 منٹ تک اسپننگ اسکیٹنگ کرتے ہوئے ورلڈ ریکارڈ میں اپنا نام داخل کرلیا۔اس قسم کی مشکل اسکیٹنگ میں سابقہ عالمی ریکارڈ مسلسل16منٹ کا تھا جسے بیلگاوی کے روہن کوکنے نامی ایک لڑکے نے انجام دیاتھا۔ اسے پانچ برس کے ثاقب نے 25منٹ میں بدلتے ہوئے ریکارڈ اپنے نام کرلیا۔ثاقب کے بارے میں معلوم ہوا ہے کہ وہ کائیگا رولر اسکیٹنگ کلب میں مسلسل مشق کیا کرتا ہے۔

اس کھیل میں اسکیٹس باندھ کر اپنے دونوں پاؤں پوری طرح مقابل سمتوں میں پھیلاتے ہوئے 180ڈگری زاویے پر بیٹھنے کی پوزیشن میں اسپننگ کی جاتی ہے جو کہ ایک بہت ہی دشوار عمل ہوتا ہے۔اور صرف پانچ سال کی عمر میں اس قدر مہارت کے ساتھ اس کھیل کامظاہرہ کرنے پر ثاقب کی بہت ہی زیادہ ستائش کی جارہی ہے۔اس طرح اس لڑکے کا نام ایشیا بُک آف ریکارڈ اور انڈیا بُک آف ریکارڈ میں درج ہوگیا ہے۔