انکولہ میں اندوہناک سڑک حادثہ؛ تیز رفتار کار لاری سے ٹکراگئی؛ پانچ کی موقع پر موت؛ چار شدید زخمی
بھٹکل 9/اگست (ایس او نیوز) ضلع اُترکنڑا کے انکولہ تعلقہ میں پیش آئے ایک اندوہناک سڑک حادثہ میں ایک ہی خاندن کے پانچ افراد موقع پر ہی ہلاک ہوگئے ،جبکہ دیگر چار شدید زخمی ہوگئے۔ مرنے والوں میں تین بچے (ایک لڑکا اور ایک لڑکی) اور ایک خاتون شامل ہیں۔ حادثہ بدھ کی شب قریب 9:30 بجے ہونلی نیشنل ہائی وے 63 پر اُس وقت پیش آیا جب تیز رفتار کار جس پر یہ سبھی نو لوگ سوارتھے، سڑک کنارے پارک کی گئی ایک لاری سے ٹکراگئی۔ حادثے میں کار کے اگلے حصے کے پرخچے اُڑ گئے ہیں۔
ذرائع سے ملی اطلاع کے مطابق کار وجئے پور (بیجاپور) ضلع کے جمنال سے دکشن کنڑا ضلع کے سبرامنیا جارہی تھی۔ مگر راستے میں ہی حادثہ کا شکار ہوگئی۔
مرنے والوں کی شناخت پربھو شرلاشٹی (45)، رُدرپّا گرو پادپّا کوری (55)، سورنا رُدرپّا کوری (45)، آکاش موتپّا شرلا شٹی (12) اور سومیا انگڈی (10) کی حیثیت سے کی گئی ہے۔
زخمیوں کی شناخت دانپّا رُدرپّا کوری، اُس کا فرزند ادتیہ رُدرپّا کوری، راجیو گوپال پاٹل اور سنتوش مُتپّاشرلا شٹی کی حیثیت سے کی گئی ہے۔
فوری طور پر زخمیوں کو کاروار ڈسٹرکٹ اسپتال میں شفٹ کیا گیا ہے۔
بتایا گیا ہے کہ آج بدھ صبح متعلقہ مقام پر ایک لاری میں خرابی پیدا ہونے کی وجہ سے سڑک کنارے پارک کی گئی تھی، جس کے بعددوپہر کو سامنے سے ایک تیز رفتار لاری اُس لاری سے ٹکراگئی ، جس میں ٹکر مارنے والی لاری کا ڈرائیور موقع پر ہی ہلاک ہوگیا تھا، اب رات ہوتے ہوتے، اُسی پارک کی ہوئی لاری سے پیچھے سے آکر تیز رفتار کار نے ٹکر ماری ہے، جس کے نتیجے میں پانچ افراد کی موقع پر ہی موت واقع ہوئی ہے۔ زخمیوں میں بھی کچھ کی حالت نازک بتائی گئی ہے۔
حادثے کی اطلاع ملتے ہی انکولہ پولس جائے وقوع پر پہنچی اور زخمیوں کو فوری طور پر قریبی اسپتال پہنچایا، جہاں سے بعد میں زائد علاج کے لئے اُنہیں کاروار لے جایا گیا۔
انکولہ پولس تھانہ میں معاملہ درج کیا گیا ہے اور پولس مزید چھان بین کررہی ہے۔