جدہ میں الحرمین تیزرفتار ریل کے اسٹیشن پر آگ بھڑک اٹھی، پانچ افراد زخمی
جدہ 30ستمبر (ایس او نیوز؍آئی این ایس انڈیا) سعودی عرب کے ساحلی شہر جدہ میں الحرمین تیزرفتار ریل کے اسٹیشن پر اتوار کے روز آگ بھڑک اٹھی ہے اور محکمہ شہری دفاع کا عملہ اس آگ پر قابو پانے کی کوشش کررہا ہے۔سعودی عرب کی نظامتِ عامہ برائے شہری دفاع نے اپنے ٹویٹراکاؤنٹ پر اس آتش زدگی کی اطلاع دی ہے اور کہا ہے کہ اس واقعے میں پانچ افراد زخمی ہوگئے ہیں۔الحرمین تیز رفتار ریلوے نے اپنیسرکاری ٹویٹر اکاؤنٹ پر بتایا ہے کہ اسٹیشن پر آگ مقامی وقت کے مطابق دوپہر 12 بج کر35منٹ پر لگی تھی۔پھراس نیاسٹیشن کی عمارت کے بڑے حصے کو اپنی لپیٹ میں لے لیا۔ ٹویٹر پر آگ کی ویڈیوز پوسٹ کی گئی ہیں اور ان میں گہرے دھویں کے بادل آسمان کی جانب بلند ہوتے ہوئے دیکھے جاسکتے ہیں۔ شہری دفاع کے عملہ کے علاوہ سعودی فورسز کے ہیلی کاپٹر آگ پر قابو پانے کی کارروائی میں شریک تھے۔شاہ سلمان بن عبدالعزیز نے الحرمین تیز رفتار ریلوے لائن کا گذشتہ سال ستمبر میں افتتاح کیا تھا۔اور اس نے اکتوبر 2018ء میں تجارتی بنیاد پر اپنی سروس کا آغاز کیا تھا۔یہ مشرقِ اوسط کے خطے میں پہلی تیزرفتار برقی ٹرین ہے۔الحرمین ریلوے لائن ساڑھے چار سو کلومیٹر طویل ہے اور اس کی دْہری پٹڑی بچھی ہوئی ہے۔یہ مکہ مکرمہ، جدہ،شاہ عبدالعزیزبین الاقوامی ہوائی اڈے،رابغ میں شاہ عبداللہ اکنامک سٹی اور مدینہ منورہ میں واقع پانچ اسٹیشنوں کو آپس میں ملاتی ہے۔اس وقت الحرمین برقی ٹرین تین سو کلومیٹر فی گھنٹا کی رفتار سے چلائی جا رہی ہے۔