ہند-افریقہ کے درمیان ٹی20- میچ کے لئے سٹہ دو سٹہ بازگرفتار 40.29لاکھ روپئے اور 5موبائل فون ضبط
بنگلورو،25؍ستمبر(ایس او نیوز) ہندوستان اور جنوبی افریقہ کے درمیان شہر میں کھیلے گئے ٹی 20- میچ کے لئے کرکٹ سٹہ لگارہے دو سٹہ بازوں کو سنٹرل کرائم برانچ (سی سی بی) پولیس نے گرفتارکرلیا ہے اور ان کے قبضہ سے 40.29 لاکھ روپئے اور 5/موبائل فون ضبط کئے ہیں - گرفتار شدہ سٹہ بازوں کی شناخت نگرتھ پیٹ کے رانا ساملا (35) اور راجا جی نگر 6/بلاک کے سندیپ (39) کے طور پر کی گئی ہے- جوائنٹ پولیس کمشنر سندیپ پاٹل نے تفصیلات بتاتے ہوئے کہا کہ ملزمین نگرتھ پیٹ کے پی آرشاستری رائن پر واقع عمارت کی دوسری منزل پر پی ایم - اینٹر پریزیز دکان میں ہندوستان اور افریقہ کے درمیان شہر کے ایم چنا سوامی اسٹیڈیم میں کھیلے گئے ٹی20- میچ کے لئے موبائل فون اور آن لائن کرکٹ سٹہ چلا رہے تھے-اطلاع پاکر سی سی بی پولیس کی خصوصی ٹیم نے دکان پر چھاپہ مار کر کرکٹ سٹہ چلا رہے مذکورہ دونوں سٹہ بازوں کو گرفتار کر کے ان کے قبضہ سے 40/لاکھ 29ہزار 800روپئے اور 5موبائل فون ضبط کئے ہیں - دونوں سٹہ بازوں کے خلاف السور گیٹ پولیس تھانے میں معاملہ درج کرلیا گیاہے- مزید جانچ جاری ہے-