سری نگر،11؍اکتوبر ( آئی این ایس انڈیا ) جموں و کشمیر کے ضلع پونچھ کے علاقے’ ڈیرہ کی گلی‘ میں سیکورٹی فورسز اور دہشت گردوں کے درمیان انکاؤنٹر میں ایک جے سی او سمیت پانچ فوجی ہلاک ہو گئے۔ سکیورٹی فورسز نے علاقے کو گھیرے میں لے لیا ہے اور تادم ِ تحریر انکاؤنٹر جاری تھا۔محکمہ دفاع کے ایک ترجمان نے بتایا کہ دہشت گردوں کی موجودگی کے بارے میں اطلاع ملنے کے بعد صبح سویرے سورن کوٹ کے ڈی کے جی کے قریب ایک گاؤں میں آپریشن شروع کیا گیا۔ حکام نے بتایا کہ بھاری ہتھیاروں کے ساتھ دہشت گردوں کی لائن آف کنٹرول عبور کرنے اور چارمیر کے جنگل میں چھپنے کی اطلاعات ملی تھیں۔

اضافی فورسز کو موقع پر بھیج دیا گیا، تاکہ دہشت گردوں کے تمام خارجی راستے بند کردیئے جائیں۔اطلاع کے مطابق تقریباً 4 دہشت گرد سرحد پار کرکے پونچھ پہنچے تھے اور اس کے بعد وادی کشمیر کی طرف روانہ ہوئے۔ سیکورٹی فورسز نے چاروں دہشت گردوں کو مغل روڈ کے قریب ڈیرہ کی گلی کے علاقہ میں گھیر لیا جس کے بعد دونوں اطراف سے فائرنگ شروع ہوئی ، یہ پانچ فوجی اس فائرنگ میں شدید زخمی ہوئے ، جس کے بعد انہیں فوری طور پر ہسپتال لے جایا گیا ، لیکن وہ راستے میں ہی دم توڑ گئے۔ اس کے ساتھ ہی سیکورٹی فورسز نے پورے علاقہ کو گھیرے میں لے لیا ۔