جوئیڈا: اسکول سے غیر حاضر رہنے والے بچے کی بے رحمانہ پٹائی۔ گاؤں والوں نے اسکول ٹیچر کو ہی سبق سکھایا
جوئیڈا،21/جنوری (ایس او نیوز) دیہاتوں کے سرکاری اسکولوں میں بچوں کی غیر حاضری ایک عام بات ہے۔ لیکن تعلقہ کے بیرمپالی لوئر پرائمری اسکول میں غیر حاضر رہنے والے چوتھی جماعت کے طالب علم جانو ٹوکّو گؤلی کے ٹیچرروسیّا ریڈی کو اس کی غیر حاضری نے ایسا مشتعل کردیا کہ اس نے بچے کا شرٹ اتار کر ہاتھ اور پیر باندھنے کے بعد اس کی بری طرح پٹائی کرڈالی۔جس کی وجہ سے اس کے بدن پربید کے نشانات ابھر آئے۔
جب یہ بات جانو کے والدین اور مقامی افراد کو معلوم ہوئی تو انہوں نے اسکول پہنچ کر بچے کے ساتھ غیر انسانی سلوک کرنے پرمتعلقہ اسسٹنٹ ٹیچر کی ایک سخت کلاس لے ڈالی اور اسی بید سے اس کو مار پیٹ کر ایک نیا سبق سکھا دیا۔اس کے بعد اسے پولیس کے حوالے کیا ہے، جہاں طلبہ کے ساتھ ظالمانہ برتاؤ کرنے کا کیس درج کردیا گیا ہے۔گاؤں والوں نے محکمہ تعلیمات کے افسران سے بھی اس ٹیچر کی شکایت کی۔ بچے کی پٹائی کا ویڈیو کلپ دیکھنے کے بعد ڈی ڈی پی آئی دیواکر شیٹی نے اس ٹیچر کوفوری طور پر معطل کردیا ہے۔