یوگنڈا میں المناک بس حادثہ ؛ 16 بچوں سمیت 48 مسافروں کی موت
یوگنڈا /لندن 27مئی (ایس او نیوز؍آئی این ایس انڈیا ) افریقی ملک یوگنڈا میں ایک سڑک حادثے میں 16 بچوں سمیت 48 افراد ہلاک ہوگئے ۔
بین الاقوامی خبر رساں ادارے کے مطابق افریقی ملک یوگنڈا میں مسافر بس مخالف سمت سے آنے والے ٹریکٹر سے ٹکرا گئی جس کے نتیجے میں بس پر سوار 48 مسافر ہلاک ہوگئے ۔ ہلاک ہونے والوں میں 16 بچے بھی شامل ہیں۔
حادثے میں ٹریکٹر پر سوار افراد زخمی ہوگئے ہیں۔ مسافر بس ٹریکٹر سے ٹکرانے کے بعد ایک اور ٹرک سے جا ٹکرائی جس کی وجہ سے ٹرک الٹ گیا اور ٹرک میں سوار 8 افراد بھی شدید زخمی ہوگئے۔ریسکیو ادارے نے امدادی کارروائی کرتے ہوئے لاشوں اور زخمی افراد کو اسپتال منتقل کردیا جہاں 4 زخمیوں کی حالت نازک بتائی جارہی ہے۔
عینی شاہدین کے مطابق حادثہ ٹریکٹر کی ہیڈ لائٹس بند ہونے کی وجہ سے پیش آیا۔ اسپتال میں 48 افراد کی لاشیں لائی گئی ہیں جب کہ 16 افراد کو زخمی حالت میں لایا گیا ہے۔ پولیس نے مسافر بس، ٹریکٹر اور ٹرک کو تحویل میں لے کر حادثے کی تحقیقات کا آغاز کردیا ہے۔یہ حادثہ یوگنڈا کے دارالحکومت کمپالا سے شمال میں 220 کلومیٹر کی دوری پر کیریان ڈونگو کے مقام پر پیش آیا۔