بنگلورو،31/مئی(ایس او نیوز) محکمہ سماجی بہبود کی طرف سے شروع کی گئی آئیراوت اسکیم کے تحت درج فہرست طبقوں سے وابستہ مستحقین کو 4500گاڑیاں فراہم کی جائیں گی۔ یہ اعلان آج وزیراعلیٰ ایچ ڈی کمار سوامی نے کیا۔ آج ودھان سودھا کے باہر درج فہرست طبقوں سے وابستہ مستحقین میں محکمے کی طرف سے مہیا کروائی گئیں 209 کاریں تقسیم کرتے ہوئے کمار سوامی نے کہاکہ 4500 کاروں میں سے دس فیصد خواتین کو فراہم کی جائیں گی۔اس کے لئے محکمہ 225 کروڑ روپے خرچ کررہاہے۔ انہوں نے کہاکہ ریاستی حکومت نے اس اسکیم کے تحت ٹیکسی خدمات فراہم کرنے والی کمپنیوں اولا اور اوبیر کے ساتھ اشتراک کیاہے، تاکہ امیدواروں کو ڈرائیونگ کی تربیت ہو اور ان کی خدمات کی مارکیٹنگ اولا اور اوبیر کے ذریعے کی جائے۔ اس اسکیم کا مقصد درج فہرست طبقوں سے وابستہ خاندانوں کے معاشی معیار کو بلند کرنا اور ان کے لئے روزگار کے بہتر مواقع پیدا کرنا ہے۔ اس موقع پر ریاستی وزیر برائے سماجی بہبود پریانک کھرگے، وزیر سیاحت سارا مہیش، امبیڈکر ڈیولپمنٹ کارپوریشن کے چیرمین نارائن سوامی اور دیگر موجود تھے۔