مینگلور: جنوبی کینرا کی آٹھ اسمبلی نشستوں کے لئے 44 اُمیدواروں نے کانگریس ٹکٹ کے لئے دی درخواست
منگلورو ،29 ؍ نومبر (ایس او نیوز) آئندہ چھ مہینوں کے اندر منعقد ہونے والے ریاستی اسمبلی الیکشن 2023 کے لئے سیاسی پارٹیوں کی سرگرمیاں تیز ہوتی جا رہی ہیں اور ٹکٹ کے لئے امیدواروں کی بھاگ دوڑ شروع ہو گئی ہے ۔
اس دوران کانگریس پارٹی نے پارٹی کے بلڈنگ فنڈ کے لئے 2 لاکھ روپے عطیہ کے ساتھ ٹکٹ کے خواہشمندوں کو درخواست جمع کرنے کی جو ڈیڈلائن قائم کی تھی وہ 21 نومبر کو ختم ہوگئی ہے ۔ اور حیرت انگیز طور پر بی جے پی کا مضبوط گڑھ سمجھے جانے والے ضلع دکشن کنڑا کی جملہ آٹھ نشستوں کے لئے کانگریس کے 44 اُمیدواروں نے ٹکٹ کے لئے درخواستیں جمع کروائی ہیں۔ ذرائع سے ملی اطلاع کے مطابق ضلع میں سب سے زیادہ پتور حلقہ سے اُمیدواروں نے کانگریس ٹکٹ کے لئے درخواستیں دی ہیں جہاں سے ایک درجن سے زائد فارمس موصول ہوئے ہیں۔اُلال سے کانگریسی لیڈر اور سابق وزیر یو ٹی قادرتنہا امیدوار ہیں ۔
ذرائع کی مانیں تو موڈبیدری سے سابق ایم ایل اے ابھے چندرا جین اس مرتبہ میدان میں نہیں اترے ہیں ، ان کی جگہ کانگریس یوتھ لیڈر متھن رائے انتخابی امیدوار ہوسکتے ہیں ۔ 'بنٹ' طبقے سے تعلق رکھنے والے متھن نے گزشتہ مرتبہ سابقہ پارلیمانی الیکشن میں نلین کمار کٹیل کے ساتھ ایک ناکام مقابلہ کیا تھا ۔ اب اس حلقہ سے کانگریس پارٹی کے ٹکٹ کے خواہشمندوں کے طور پرمتھن رائے کے علاوہ 'بیلّوا' طبقہ سے تعلق رکھنے والے راج شیکھر کوٹیان اور پرتیبھا کولائی نے بھی درخواست دے رکھی ہے ۔
بی رما ناتھ رائے نے بنٹوال حلقہ سے کئی مرتبہ الیکشن جیتا ہے ، اب ان کے سامنے اپنی ہی پارٹی کے مقابلہ پر راکیش ملائی اور اشوین رین جیسے دو ہی نام سامنے آئے ہیں ۔ اسی طرح بیلتنگڈی سے کئی مرتبہ الیکشن جیتنے والے وسنت بنگیرا میدان میں اترنے کے امکانات ہیں ۔
دو حلقے جہاں سے کانگریس پارٹی اپنا ٹکٹ عیسائیوں کے لئے مختص رکھتی ہے اس میں ایک منگلورو سٹی ساوتھ ہے ۔ یہاں سے 7 خواہشمندوں نے ٹکٹ کے لئے درخواست دی ہے جس میں ایک ہندو بھی شامل ہے ۔ اس سیٹ کے لئے سابق ایم ایل اے جے آر لوبو کو ٹکٹ حاصل کرنے کے لئے اس وقت اپنی ہی پارٹی کے سابق ایم ایل سی ایوان ڈیسوزا ، شالیت پنٹو ، اے سی ونئے راج، آشیت پیریرا اور میرل ریگو کا سامنا ہے ۔
منگلورو سٹی نارتھ حلقہ میں سابق ایم ایل اے محی الدین باوا کو ٹکٹ حاصل کرنے کے لئے کے پی سی سی جنرل سیکریٹری عنایت علی ، سابق میئر ششی دھر ہیگڈے، کویتا سانیل ، یوتھ لیڈر لقمان بنٹوال، کارپوریٹر پرتیبھا کولائی ، انیل کمار پجاری، الطاف سورتکل اور پی ایل پدمنابھا سے مقابلہ ہے ۔
سولیا کا حلقہ شیڈول کاسٹ کے لئے مختص ہے اور یہاں جملہ 8 افراد ٹکٹ کے امیدوار ہیں جن میں اَپّی، پرہلاد بیلّی پاڈی، ابھیشیک بیلّی پاڈی، نندا کمار اور کرشنپّا ہیں ۔
پتور حلقہ کی نمائندگی ماضی میں شکنتلا شیٹی کرتی رہی ہیں اور اس مرتبہ وہ ٹکٹ کی خواہشمند ہیں ، مگر ان کے مقابلے میں وشوا ناتھ رائے، بھرت منڈّوڈی، دھنند جیا اڈپنگایا، ایم ایس محمد، ڈاکٹر راجام ، مامتا گٹّی ، ستیش کیڈنجے، ہیمناتھا شیٹی ، دیویا پربھا، کرپا امر الوا، کوشل پرساد شیٹی اور چندرہاسا شیٹی جیسے 13 افراد ٹکٹ طلب کرنے کی قطار میں لگ گئے ہیں ۔